देशात जागोजागी इलेक्ट्रिक वाहनाना आग लागण्याचे अपघातात समोर येत आहेत, यादरम्यान शनिवारी पश्चिम तामिळनाडूमधील होसूरमध्ये एका इलेक्ट्रिक स्कूटरला अचानक आग लागली. या घटनेत आजूबाजूच्या लोकांनी वेळीच आग आटोक्यात आणण्यास मदत केल्याने वाहनाचा मालक सतीश बचावला.

काही दिवसांपूर्वी उत्तर तामिळनाडूमधील एका बाप-लेकीचा अशाच एका घटनेत श्वास गुदमरून मृत्यू झाल्याची घटना समोर आली होती, या घटनेत घराबाहेर रात्रभर चार्ज होत असलेली इलेक्ट्रिक स्कूटरला अचानक आग लागली आणि धूर सगळ्या परीसरात भरला होता

पोलिसांनी दिलेल्या माहितीनुसार, होसूरला लागून असलेल्या बेंगळुरूमधील एका खासगी कंपनीत पर्यवेक्षक म्हणून काम करणाऱ्या सतीशने गेल्या वर्षी ही स्कूटर खरेदी केली होती. "i-Praise+ नावाची इलेक्ट्रिक स्कूटर -- 2015 पासून भारतातील इलेक्ट्रिक वाहन उत्पादक कंपनी Okinawa द्वारे उत्पादित केली जाते," असे एका पोलीस अधिकाऱ्याने सांगितले.

दरम्यान शनिवारी सतीश त्याच्या स्कूटरवरून जात असताना अचानक त्याला सीटच्या खालून आग आणि धूर निघताना दिसला आणि त्याने लगेच स्कूटरवरून उडी मारली. काही सेकंदातच आगीच्या ज्वाळांनी वाहन वेढले आणि रस्त्यावरून जाणाऱ्यांनी ती आग आटोक्यात आणण्यास मदत केली. मात्र, वाहन जळून खाक झाल्याचे पोलिसांनी सांगितले.