Twitter Blue Tick : ट्विटर युजर्ससाठी ही मोठी बातमी आहे. मायक्रोब्लॉगिंग साईट ट्विटरनं लेगसी व्हेरिफाईड अकाऊंटवरुन ब्लू टिक काढून टाकली आहे. गुरुवारी मध्यरात्रीपासून व्हेरिफाईड अकाऊंट्सवरून फ्री ब्ल्यू टिक्स काढून टाकण्यास सुरुवात झालीये.

या सेवेसाठी ज्या वापरकर्त्यांनी पैसे मोजले नाहीत अशांच्या अकाऊंटवरून ब्ल्यू टिक काढण्यात आल्या आहेत. याचा फटका अनेक सेलिब्रिटींसह राजकीय नेत्यांना बसला आहे.

दरम्यान, ट्विटर विकत घेतल्यानंतर एलन मस्क यांनी ब्ल्यू टिकसाठी पैसे मोजावे लागणार असल्याची घोषणा केली होती. ज्या अकाऊंटधारकांनी पेड सबस्क्रिप्शन घेतलेलं नाही, त्यांच्या अकाऊंटवरून ब्ल्यू टिक काढणार असल्याचं जाहीर करत यासाठी युजर्सला 20 एप्रिलपर्यंत मुदत देण्यात आली होती. ही मुदत गुरुवारी मध्यरात्री संपली.

त्यानंतर ट्विटरनं ब्ल्यू टिक काढण्यास सुरुवात केली. त्यामुळं अनेक व्हेरिफाईट युजर्सच्या ब्ल्यू टिक आता बंद झाल्या आहेत. यात क्रिकेटर विराट कोहली, एम. एस. धोनी, सचिन तेंडुलकर, फुटबॉलपटू ख्रिस्तियानो रोनाल्डो, महानायक अमिताभ बच्चन, अभिनेता सलमान खान, शाहरूख खान, मुख्यमंत्री एकनाथ शिंदे, विरोधी पक्षनेते अजित पवार, यूपीचे मुख्यमंत्री योगी आदित्यनाथ यांच्यासह अनेक बड्या व्यक्तींच्या व्हेरिफाईड ट्विटर अकाऊंटच्या ब्ल्यू टिक्स काढून काढण्यात आल्या आहेत.

तसेच एखाद्या व्यक्तीला ब्ल्यू टिक हवी असेल तर त्यासाठी त्याला ट्विटरला पैसे द्यावे लागणार आहेत. ज्या व्यक्ती किंवा संस्था पैसे मोजतील त्यांनाच फक्त ट्विटर ब्ल्यू टिक देण्यात येणार आहे. ट्विटरनं 2009 मध्ये ब्ल्यू टिक देण्यास सुरुवात केली होती.