चीनमधील युनानमध्ये सापडलेल्या ७१०० वर्षांपूर्वीच्या एका स्त्रीच्या सांगाड्याच्या डीएनए विश्लेषणातून मानवाच्या इतिहासातील एक अद्याप अज्ञात असलेला वंश 'घोस्ट लिनीएज' उघड झाला आहे. या शोधामुळे केवळ तिबेटी वंशाचा उगम स्पष्ट होतोय, तर पूर्व आणि दक्षिण-पूर्व आशियातील मानववंशाच्या प्राचीन आणि गुंतागुंतीच्या चित्रालाही एक नवा आयाम मिळतो आहे.
या नेओलिथिक कालखंडातील स्त्रीला संशोधकांनी "Xingyi_EN" असे नाव दिले असून तिचा सांगाडा दक्षिण-पश्चिम चीनमधील 'Xingyi' या पुरातत्व स्थळी आढळून आला. रेडीओकार्बन डेटिंगनुसार ती सुमारे ७१०० वर्षांपूर्वी जगत होती. विश्लेषण दर्शवते की Xingyi_EN ही शिकारी करणाऱ्या समाजातील होती.
डीएनए चाचणीमधून तिचा वंश एका वेगळ्याच मानववंशाशी संबंधित असल्याचे दिसून आले ज्याला आता 'Basal Asian Xingyi Lineage' असे नाव देण्यात आले आहे. हा वंश सध्याच्या कोणत्याही ज्ञात मानववंशाशी जुळत नाही आणि त्याने इतर मानव गटांपासून सुमारे ४०,००० वर्षांपूर्वी वेगळा विकासक्रम स्वीकारला होता. विशेष म्हणजे या वंशाने नंतरच्या काळात आधुनिक तिबेटी लोकांच्या वंशात योगदान दिल्याचेही स्पष्ट झाले आहे.
या शोधात युनान प्रांतातील १२७ मानव सांगाड्यांचे डीएनए विश्लेषण करण्यात आले. त्यातील बरेच सांगाडे १४०० ते ७१५० वर्षांपूर्वीचे आहेत. आज युनान प्रांत हा चीनमधील सर्वात जास्त भाषिक व वांशिक विविधतेचा भाग मानला जातो. याच प्रांतातील प्राचीन मानवी अस्तित्व अभ्यासल्यास तिबेट पठारावर राहणाऱ्या लोकांचा उगम, तसेच आग्नेय आशियातील Austroasiatic भाषिक समाजांचे मूळ अधिक स्पष्ट होऊ शकते.
संशोधकांच्या मते, "या भागात पूर्वी राहणाऱ्या प्राचीन मानवांनी आशियातील अनेक रहस्यांची उत्तरं दडवून ठेवली आहेत." Xingyi_EN चा सांगाडा ही त्या उत्तरांपैकी एक महत्त्वाची सुरुवात ठरते.
या संशोधनाचा अहवाल प्रतिष्ठित "Science" या वैज्ञानिक जर्नलमध्ये प्रकाशित झाला आहे. त्यातून असे स्पष्ट होते की मानवाचा उत्क्रांतीचा इतिहास इतका थरारक आहे की अनेक "अदृश्य" वंश आजही आपल्याला अनपेक्षित स्वरूपात सापडत आहेत. Xingyi_EN ही त्यातील एक ठोस, भौतिक पुरावा आहे एक गूढ भूतकाळातून आलेला पुरावा जो मानवजातीच्या इतिहासाला नव्याने समजून घेण्याची संधी देते.
या शोधामुळे युनान प्रांत आता मानववंशाच्या उत्क्रांतीचा नवा 'हॉटस्पॉट' म्हणून उदयास येत आहे. भविष्यकाळातही इथून असेच अनेक रहस्योद्घाटन होण्याची शक्यता नाकारता येत नाही.
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.