व्हॉट्सअ‍ॅपवर दररोज कित्येक प्रमाणात व्हिडिओ शेअर केले जातात. तुमच्या फॅमिली ग्रुपवर किंवा मित्रांच्या ग्रुपवर कित्येक वेळा अगदी मोठ्या लांबीचे व्हिडिओही येतात. हे व्हिडिओ फास्ट फॉरवर्ड करता येत नसल्यामुळे, कित्येक वेळा ते संपूर्ण पहावे लागतात. मात्र, आता यावर कंपनीने एक उपाय शोधला आहे.

मोठे व्हिडिओ पाहताना तुम्हाला जर पुढे जायचं असेल, तर यूट्यूबवर त्यासाठी खास सोय करण्यात आली आहे. डाव्या किंवा उजव्या बाजूला डबल टॅप करून तुम्ही व्हिडिओमध्ये दहा सेकंद पुढे किंवा मागे जाऊ शकता. यूट्यूबसह अन्य काही प्लॅटफॉर्मवर देखील हे फीचर उपलब्ध आहे. आता असंच फीचर व्हॉट्सअ‍ॅपवर देखील येणार आहे.

WAbetainfo या वेबसाईटने याबाबत माहिती दिली आहे. व्हॉट्सअ‍ॅपवर येणाऱ्या नवनवीन फीचर्सबद्दल ही वेबसाईट रिपोर्ट पब्लिश करत असते. व्हिडिओ फॉरवर्डिंग फीचर कसे असेल याचा एक स्क्रीनशॉट देखील या वेबसाईटवर शेअर करण्यात आला आहे.

हे फीचर सध्या व्हॉट्सअ‍ॅप अँड्रॉईड बीटा 2.23.24.6 या अपडेटवर उपलब्ध आहे. इतर यूजर्सना हे फीचर कधी उपलब्ध केलं जाईल याबाबत अद्याप कंपनीने कोणतीही माहिती दिलेली नाही. लवकरच या फीचरची चाचणी पूर्ण होऊन, ते सर्वांसाठी उपलब्ध होईल अशी शक्यता वर्तवण्यात येत आहे. (Tech News)