ऑगस्ट महिन्यात पावसाने दिलेली ओढ व काही वर्षांपासून हवामानातील बदल यामुळे फुले उमलण्यास उशीरा सुरुवात होत आहे.
कास : आपल्या अलौकिक सौंदर्याने लाखो पर्यटकांच्या आकर्षणाचा विषय असलेल्या कास पठारावर फुलांचा अधिकृत हंगाम सुरू झाला असला, तरी कासची (Kaas Pathar) फुले प्राथमिक अवस्थेतच आहेत. मोठ्या प्रमाणावर फुलांचे गालिचे बहरण्यासाठी पंधरा सप्टेंबर नंतरच सुरूवात होईल, असे सद्यस्थितीवरून वाटत आहे.
पावसाळा सुरू झाला की, कासला फुलांची चाहूल लागते. जून, जुलै महिन्यात येथील जीवसृष्टी बाळसे धरते. पूर्ण कातळ खडक असलेलं पठार हिरवा रंग परिधान करतं. यातूनच हजारो प्रकारच्या फुलांच्या प्रजाती उगवण्यास सुरूवात होतात. पंधरा ऑगस्टनंतर फुले उमलण्यास सुरूवात होते.
पण, यावर्षी ऑगस्ट महिन्यात पावसाने दिलेली ओढ व काही वर्षांपासून हवामानातील बदल यामुळे फुले उमलण्यास उशीरा सुरुवात होत आहे. त्यामुळे यावर्षी एक सप्टेंबर नंतरच फुलांच्या प्रजाती फुलू लागल्या. सद्यस्थितीत पठारावर चवर (रानहळद) मोठ्या प्रमाणात बहरली असून या फुलाचे पांढरेशुभ्र गालिचे मनमोहक दिसत आहेत.
चवरनंतर पठाराला मोठ्या प्रमाणात आच्छादित करतात ते लाल, गुलाबी तेरडा, पांढरे गेंद व निळी सीतेची आसवे ही फुले. तेरड्याने दर्शन द्यायला सुरुवात केली असून पांढरे गेंद व निळी सितेची आसवे ही काही प्रमाणात उमलू लागली आहेत. या तीन फुलांची लाल, निळी, पांढरी छटा पठाराला खरा साज देते.
इतर बाकीची दुर्मिळ फुले कमी प्रमाणात असतात. यामध्ये आभाळी, नभाळी, दिपकांडी, मंजिरी, हिरवी निसुर्डी, पिवळी सोनकी ही फुले काही प्रमाणात दिसत आहेत. पठारावरील दुर्मिळ फुले व जीवसृष्टी समजून घ्यायची असेल तर समितीच्या वतीने उपलब्ध असलेले गाईड घेतल्यास ही फुले समजून घेता येतात.
संपूर्ण महाराष्ट्रावर दुष्काळाची छाया असताना पावसाचे माहेरघर असणारा हा परिसर ही गेल्या तीन आठवड्यांपासून पावसापासून वंचित होता. परिणामी, पठारावरील फुले व जीवसृष्टी धोक्यात आली होती. पण, दोन दिवसांपासून पावसाने कमबॅक केल्याने पठाराला जीवदान मिळाले असून फुले चांगली बहरतील अशी अपेक्षा व्यक्त होत आहे.
हंगामाचे उद्घाटन झाल्यानंतर आलेला हा पहिलाच शनिवार असल्याने काल ऑनलाईन बुकिंग करून १८०० पर्यटक आले होते तर प्रत्यक्ष जागेवर बुकिंग करून दिवसभरात तीन हजारांहून अधिक पर्यटकांनी फुलांचा आनंद घेतला.
आम्ही कास समितीच्या वेबसाईटवरील फोटो पाहून आज फुले पाहण्यासाठी आलो होतो. आताची फुले समाधानकारक असली तरी मोठ्या प्रमाणात गालिचे पाहता आले नाहीत याची खंत आहे.
-विशाल कायरकर, पर्यटक पुणे
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates, मराठी ताज्या बातम्या, मराठी ब्रेकिंग न्यूज, मराठी ताज्या घडामोडी. And Live taja batmya on Esakal Mobile App. Download the Esakal Marathi news Channel app for Android and IOS.