कोकरूड : कास पठाराप्रमाणेच (Kaas Plateau) सध्या शिराळा (Shirala) पश्चिम भागात सह्याद्रीच्या डोंगर पठारावर विविधरंगी रानफुले बहरली असून अनेक हौशी निसर्गप्रेमी येथे भेट देत आहेत. सध्या या भागात ऊन-पावसाचा खेळ सुरू आहे.

या फुलांचा फुलण्याचा हंगाम सुरू असून माळरानावर विविधरंगी फुलांचा सडा पसरला आहे. त्यामुळे परिसर अत्यंत नयनरम्य व आल्हाददायक दिसू लागला आहे. निसर्ग आणि पर्यावरणाच्या विविधतेने शिराळा तालुक्यातील जंगल समृद्ध आहे.

चांदोली धरण, चांदोली राष्ट्रीय उद्यान, गुढे पाचगणी पठार, झोळंबी पठार, उदगिरी पठार, कोकरूड येथील गवळोबा पठार, विविध प्रकारच्या वनस्पती, लता-वेलींनी घनदाट असलेले जंगल पावसाळ्यात हिरव्या, पिवळ्या, लाल, गुलाबी रंगांनी बहरून गेले आहे.

तेरडा, कुरडू, मखमल, सोनकी, नीलिमा, जांभळी, मंजिरी, गेंद आदी फुले माळरानावर मुबलक बहरत असून अतिशय विलोभनीय असे दृश्य डोंगर-पठारावर पाहायला मिळत आहे. पिवळे, हिरवे, लाल, केशरी, निळे असे विविध रंग माळरानावर व झाडी-झुडपात दिसून येत आहेत. पर्यटक निसर्गप्रेमींसाठी ही पर्वणी असून अनेक हौशी निसर्गप्रेमी या माळरानांना भेट देत आहेत. शिराळा तालुक्यातील जंगलात बहरलेला हा निसर्ग ठेवा कॅमेऱ्‍यात टिपून घेण्यासाठी अनेक निसर्गप्रेमी माळरानांना आवर्जून भेट देत आहेत.