मुंबईतल्या वांद्रे रेल्वे स्थानकावर कार्यरत असलेल्या महिला पोलिसांची काही तरुणांनी छेड काढली आहे. या घटनेचा व्हिडीओ सोशल मीडियावर व्हायरल होत आहे. या व्हिडीओवर लोकांच्या संतप्त प्रतिक्रिया उमटत आहेत.

मुंबईच्या पश्चिम रेल्वे मार्गावरील वांद्रे स्थानकात रील करणाऱ्या तरुणांकडून लोकलच्या दरवाजात उभे राहून स्थानकावर कार्यरत असलेल्या महिला पोलीस कर्मचाऱ्यांना अश्लील भाषेचा वापर करून छेडतानाचा एक व्हिडिओ समोर आला आहे.

यासंबंधीची एक तक्रार वांद्रे लोहमार्ग पोलिसांना करण्यात आली आहे. या आधारे त्या रील बनवणाऱ्या आणि महिलांना छेडणाऱ्या आरोपीचा वांद्रे लोहमार्ग पोलीस शोध घेत आहेत.

दोन दिवसांपूर्वी पश्चिम रेल्वेच्या वांद्रे रेल्वे स्थानकातून बोरिवलीच्या दिशेने जाणाऱ्या धिम्या लोकलच्या दरवाज्यात उभे राहून एका उनाड तरुणाने रील बनवला. या रीलमध्ये तो स्वतःला मस्तान कंपनीचा म्होरक्या समजून त्या कर्मचाऱ्यांसोबत असभ्य वर्तन करत होता.

एका नागरिकाने हा व्हिडीओ मुंबई पोलीस आणि लोहमार्ग पोलिसांना ट्विटवर टॅग केला आहे यानंतर आता वांद्रे लोहमार्ग पोलीस या मस्तान कंपनीच्या मोहरक्याला अटक करण्याच्या तयारीत आहेत.