Gas Blast Viral Video : पुण्यात एका रहिवासी घरात गॅस सिलेंडरमधून झालेल्या गळतीमुळे जबरदस्त स्फोट झाला असून, यामध्ये घराचे प्रचंड नुकसान झाले आहे. मात्र सुदैवाने, प्रसंगावधान राखल्यामुळे घरातील दोन व्यक्तींनी वेळेत पळ काढत आपला जीव वाचवला. या संपूर्ण घटनेचा थरारक व्हिडिओ सध्या सोशल मीडियावर वेगाने व्हायरल होत आहे.

ही घटना सीसीटीव्ही कॅमेऱ्यात कैद झाली असून, व्हिडिओमध्ये स्पष्ट दिसते की किचनमध्ये सिलेंडरमधून गॅस गळती होत होती. घरातील एका व्यक्तीने ही गोष्ट लक्षात घेऊन तातडीने सिलेंडर किचनमधून उचलून हॉलमध्ये नेऊन ठेवला. यानंतर त्याने दुसऱ्या व्यक्तीसह घराबाहेर धाव घेतली.

गॅसची गळती थांबली असावी असे वाटल्याने काही वेळाने दोघेही पुन्हा घरात परत आले. मात्र ते सिलेंडरजवळ पोहोचताच अचानक भीषण स्फोट झाला. आवाज एवढा जोरात होता की आजूबाजूच्या घरांनाही हादरा बसला.

स्फोटामुळे घरातील फर्निचर, भिंती, छत आणि इलेक्ट्रॉनिक वस्तूंचे मोठ्या प्रमाणात नुकसान झाले आहे. घराचा बराचसा भाग उद्ध्वस्त झाला असून, सुदैवाने कोणतीही जीवितहानी झाली नाही. मात्र हा प्रसंग अत्यंत धक्कादायक होता.

या घटनेमुळे स्थानिकांमध्ये भीतीचं वातावरण निर्माण झालं असून, तातडीने अग्निशमन दलाला बोलावण्यात आलं. त्यांनी उर्वरित भागाची पाहणी करून सुरक्षिततेसाठी काही सूचना दिल्या.

सुरक्षेसाठी काय करावे?

अशा प्रकारच्या दुर्घटनांपासून बचाव करण्यासाठी नागरिकांनी पुढील गोष्टींचं पालन करणं अत्यावश्यक आहे

• गॅस गळतीची शंका आल्यास तात्काळ घरातील विजेचे स्वीच बंद करावेत.

• सिलेंडर हलवण्याआधी दरवाजे-खिडक्या उघडून हवामान मोकळं करावं.

• शक्य असल्यास अग्निशमन दल, पोलीस किंवा गॅस कंपनीशी तात्काळ संपर्क साधावा.

नागरिकांनी प्रसंगावधान राखून आपल्या आणि इतरांच्या सुरक्षिततेसाठी दक्षता बाळगणं गरजेचं आहे. अशा घटना केवळ एका क्षणात जीवघेण्या ठरू शकतात, त्यामुळे प्रत्येकाने सजग राहणं अत्यंत आवश्यक आहे.