Social Media Reacts to Doctor’s Pregnancy Dance: सोशल मीडियावर सतत काही ना काही मजेशीर, आश्चर्यकारक व्हिडिओ व्हायरल होत असतात. ज्यामुळे आपल्याला हसू आवरत नाही. पण कधी कधी असेही व्हिडिओ व्हायरल होतात ज्यांचा कमेंट बॉक्स ट्रोल्सने भरलेला असतो. याचे एकमेव कारण म्हणजे त्या व्यक्तीने समाजाच्या अमान्य काहीतरी केलेलं असत.

असाच एक व्हिडिओ सध्या सोशल मीडियावर व्हायरल होत असून ट्रोलिंगचा शिकारही झाला आहे.

व्हायरल व्हिडिओ

यूकेमध्ये राहणाऱ्या आणि तिथे डॉक्टर म्हणून कार्यरत असलेल्या डॉ. सोनम डहिया यांंनी नुकताच एक व्हिडीओ सोशल मीडियावर पोस्ट केला आहे, जो सध्या चांगलाच व्हायरल झाला आहे. या व्हिडीओत त्या आपल्या बेबी बंपसह एक प्रसिद्ध बॉलिवूड गाण्यावर प्रसिद्ध कोरियोग्राफर आदिल खानसोबत नाचताना दिसत आहे.

डॉ. डहिया यांनी ३ मे रोजी हा व्हिडीओ तिच्या इंस्टाग्राम अकाउंटवर शेअर केला होता. ‘डिंग डॉन्ग डोले’ या गाण्यावर थिरकणारा तिचा हा व्हिडीओ आतापर्यंत ५ कोटींपेक्षा अधिक वेळा पाहिला गेला आहे.

लोकांचा मिश्र प्रतिसाद

या व्हिडीओवर सोशल मीडियावर वेगवेगळ्या प्रकारच्या मिश्र प्रतिक्रिया येत आहेत. अनेकांनी त्यांच्या आत्मविश्वासाचं आणि प्रेग्नंट असूनही सक्रिय (Active) राहण्याच्या प्रयत्नाचं कौतुक केलं आहे. खास करून अनेक प्रेग्नंट महिलांनी या व्हिडीओला सकारात्मक प्रतिसाद दिला असून, त्यांना हा व्हिडीओ प्रेरणादायक वाटला आहे.

पण काही लोकांनी त्यांच्या डान्सवर प्रश्नही विचारले आहेत. "गर्भावस्थेत असा डान्स करणं सुरक्षित आहे का?" असा प्रश्न काहींनी केला. एका युजरने तर थेट विचारलं, "डॉक्टर सांगू शकतील का की अशा डान्समुळे बाळाला काही धोका नाही का?"

डॉ. डहिया यांचं स्पष्ट उत्तर

या ट्रोलिंगला प्रत्युत्तर देत डॉ. सोनम डहिया यांनी एका वेगळ्या पोस्टमध्ये आपली भूमिका स्पष्ट केली. त्यांनी लिहिलं की, “मी स्वतः डॉक्टर असल्यामुळे मला हे माहीत आहे की, जर तुमची तब्येत चांगली असेल आणि प्रेग्नेंसीमध्ये कोणतीही गुंतागुंत नसेल, तर व्यायाम करणं पूर्णपणे सुरक्षित आहे. यामुळे गर्भपात किंवा अकाली प्रसूतीचा धोका वाढत नाही.”

त्यांनी हे देखील नमूद केलं आहे की, प्रत्येक महिलेनं आपल्या डॉक्टरचा सल्ला घेणं आवश्यक आहे कारण प्रत्येकाची प्रकृती आणि गर्भावस्थेची स्थिती वेगळी असते.

ड्रेस आणि वैयक्तिक निवडीवर मत

डान्स करताना घातलेल्या कपड्यांवरुनही काही लोकांनी टीका केली होती. यावर उत्तर देताना डॉ. डहिया म्हणाल्या, “व्यायाम हा वैयक्तिक अनुभव असतो. त्या वेळी मी काय घालते हा माझा वैयक्तिक निर्णय आहे. हे मला आत्मबळ आणि आत्मविश्वास देतं.”

शेवटी त्यांनी लिहिलं की, “इतरांची टीका करण्याऐवजी आपण समजूतदारपणा आणि करुणा दाखवायला हवी. प्रत्येक व्यक्तीला स्वतःच्या शरीरावर आणि आयुष्यावर निर्णय घेण्याचं स्वातंत्र्य असावं. माझं शरीर, माझा निर्णय.”

डॉ. डहिया यांचा हा दृष्टिकोन अनेकांसाठी प्रेरणादायी ठरत आहे आणि सोशल मीडियावर या विषयावर चांगलच चर्चा होताना दिसत आहे.

डिस्क्लेमर : सदर लेख फक्त सामान्य माहितीसाठी आहे. सकाळ माध्यम समूह अशा कोणत्याही गोष्टींची पुष्टी करत नाही. अधिक तपशीलांसाठी तुम्ही तज्ज्ञांचे मार्गदर्शन घेऊ शकता.