Dhule News : महाराष्ट्र सुवर्णजयंती नगरोत्थान योजनेंतर्गत एकूण दहा कोटी ३९ लाख रुपये खर्चातून धुळे शहरातील विविध प्रभागांत एकूण २८ रस्ते डांबरीकरण, काँक्रिटीकरण, बंदिस्त गटार, पाइपलाइन, बैठकव्यवस्था आदी कामे करण्यास स्थायी समितीने गुरुवारी (ता. १५) मंजुरी दिली. (10 Crore Road and Sewer Standing Committee approved in Dhule news)

महाराष्ट्र सुवर्णजयंती नगरोत्थान योजना-२०२२-२३ अंतर्गत रस्ते डांबरीकरण, काँक्रिटीकरणासह बंदिस्त गटार, पाइपलाइन, बैठकव्यवस्था आदी कामांना २५ मार्च २०२३ ला जिल्हाधिकाऱ्यांकडून मंजुरी देण्यात आली. या कामासाठी एकूण दहा कोटी ३९ लाख ८२ हजार ३८८ खर्चास आर्थिक व प्रशासकीय मान्यता आहे.

या खर्चास तांत्रिक मंजुरी मिळाल्यानंतर निविदा मागविण्यात आल्या. या प्रक्रियेत मे. जय कन्स्ट्रक्शन (शेकडा ७.०० टक्के जास्त), एन. एम. सोनवणे (०.००१ टक्के), डी. आर. पाटील कन्स्ट्रक्शन प्रा.लि. (१.०० टक्के जास्त) अशा निविदा प्राप्त झाल्या.

हेही वाचा : Credit Card फसवणूक....काय घ्याल काळजी?

यात एन. एम. सोनवणे यांची सर्वांत कमी दराची अर्थात दहा कोटी ३९ लाख ८१ हजार ३४९ रुपयांची निविदा होती. स्थायी समितीने त्यांना काम देण्यास मंजुरी दिली.

ही कामे प्रभाग १, २, ३, ४, ५, ६, ८, १०, ११, १४, १९ मध्ये करण्यात येणार आहेत. यात ४९ लाख ९५ हजार १०० रुपये खर्चातून देवपूर अमरधाम येथे गॅस दाहिनी भागात नागरिकांसाठी बैठकव्यवस्था, तर ३४ लाख ९२ हजार ८७८ रुपये खर्चातून प्रभाग ६ मधील मोराणे गावात हनुमान टेकडी ते मोराणे गावापर्यंत पाइपलाइन टाकण्याच्या कामांचा समावेश आहे.