Dhule Crime News : देवभाने (ता. धुळे) गावाजवळील एका कंपनीत कामास असलेल्या कुटुंबातील पाच वर्षांच्या बालिकेवर लैंगिक अत्याचाराची घटना घडली आहे. संशयितदेखील त्याच कंपनीत कामास आहे.

मुलीला आपल्या घरात बोलवून तिच्यावर लैंगिक अत्याचार केला. या प्रकरणी पीडित बालिकेच्या आईने दिलेल्या फिर्यादीवरून येथील पोलिस ठाण्यात गुन्हा दाखल झाला.

(लोकल ते ग्लोबल लेटेस्ट अपडेट मिळवा सकाळच्या व्हॉट्सअप चॅनेलवर फक्त एका क्लिकमध्ये)

बुधवारी (ता. २०) सायंकाळी साडेसातच्या सुमारास पीडित कुटुंबांच्या शेजारी राहणाऱ्या दिनेश गणावर साहनी ऊर्फ बडका बाबू (वय ३३, रा. हंतराल, जि. मुज्जफरपूर, बिहार, सध्या रा. देवभाने, ता. धुळे) याने बालिकेस हाक मारून घरात बोलावले.

तिचे आई-वडील व संशयित एकाच कंपनीत कामाला असल्याने पीडित त्याला ओळखत होती. म्हणून ती संशयिताने बोलावल्याबरोबर गेली.

तिथे त्याने मुलीवर लैंगिक अत्याचार केला. मुलगी कुठे गेली म्हणून तपास करीत तिच्या आईने हाका मारल्या. त्यावर पीडितेने जवळच्या शेडमधून प्रतिसादात्मक होकार दिला. तिथे जाऊन पाहिल्यावर लैंगिक अत्याचाराच्या घटनेचा उलगडा झाला.

या प्रकरणी दिनेश साहनी यास अटक झाली असून, सहाय्यक पोलिस निरीक्षक गणेश फड तपास करीत आहेत. संशयितास धुळे न्यायालयात हजर केले असता त्याला एक दिवसाची पोलिस कोठडीत ठेवण्याचे आदेश देण्यात आले.