Dhule News : शहरातील बड्या मालमत्ता कर थकबाकीधारकांवर आयुक्त अमिता दगडे-पाटील यांच्या आदेशाने जप्तीची कारवाई सुरू करण्यात आली आहे.

त्यानुसार अवधान येथे जप्तीपथक कारवाईसाठी पोचले असता थकबाकीदाराने लाखाचा धनादेश दिल्याने जप्तीची कारवाई टळली. (Auto service avoids confiscation by giving check dhule news)

अवधान येथील मुकेश अग्रवाल यांच्या प्रीती ऑटो सर्व्हिसकडे (वासवा टायर) एक लाख ३३ हजार ६२१ रुपयांची थकबाकी होती. थकबाकी भरण्याबाबत त्यांना वारंवार नोटिसा बजावण्यात आल्या होत्या.

तसेच १५ दिवसांची मुदत देऊनदेखील त्यांनी भरणा केला नाही. त्यामुळे अतिरिक्त आयुक्त करुणा डहाळे, कर मूल्य निर्धारण अधिकारी पल्लवी शिरसाट यांच्या मार्गदर्शनाखाली जप्तीपथक कारवाईसाठी घटनास्थळी पोचले.

त्यानंतर श्री. अग्रवाल यांनी एक लाख आठ हजार ५८३ रुपयांचा धनादेश दिल्याने जप्तीची कारवाई स्थगित करण्यात आली.

जप्तीपथकातील वसुली अधीक्षक शिरीष जाधव, निरीक्षक मुकुंद अग्रवाल, मधुकर वडनेरे, गोरख धनगर, सचिन पवार आदी उपस्थित होते.