Dhule News : मोटार वाहन कायद्यातील तरतुदीनुसार दुचाकीस्वाराने व त्याच्या मागील सीटवरून प्रवास करणाऱ्या व्यक्तीने हेल्मेटचा वापर करणे बंधनकारक आहे.

असे असतानाही अनेक मोटारसायकलचालक हेल्मेटचा वापर करीत नसल्याचे आढळले आहे.

दैनंदिन घडणाऱ्या रस्ते अपघातात सर्वाधिक अपघात दुचाकीचे आहेत. हेल्मेट न घातल्यामुळे मृत्युमुखी पडणाऱ्या दुचाकीस्वारांची संख्या मोठी असून, दर वर्षी राज्यात सुमारे सात हजार दुचाकीस्वार रस्ते अपघातात मृत्युमुखी पडतात. (Bikers without helmets banned from entering offices Decision of Sub Regional Transport Office to enforce traffic rules by two wheelers Dhule News )

दुचाकीस्वारांनी वाहतुकीचे नियम पाळावेत व त्यांना हेल्मेटचे महत्त्व पटावे यासाठी उपप्रादेशिक परिवहन कार्यालय, नंदुरबार यांच्याद्वारे जिल्ह्यातील सर्व शासकीय, निमशासकीय व खासगी कार्यालये, शैक्षणिक संस्था, बँका, मॉल्स, हॉटेल्स इत्यादींना हेल्मेटसक्तीबाबत नोटीस बजावण्यात येत असून, हेल्मेट न घालणाऱ्या दुचाकीस्वारांना त्यांच्या संस्थेत प्रवेश न देण्याबाबत सूचना देण्यात आल्या आहेत.

कलम १९४ ड अन्वये विनाहेल्मेट मोटारसायकल चालविणे किंवा चालविण्यास संमती देणे अशा दोघांवरही जबाबदारी निश्चित करण्यात आलेली असून, त्यांना दंडात्मक कारवाईची तरतूद करण्यात आली आहे.

एक हजार रुपये दंड व तीन महिने ड्रायव्हिंग लायसन्स निलंबित करण्याची तरतूद आहे.

हेही वाचा : Credit Card फसवणूक....काय घ्याल काळजी?

"जिल्ह्यातील सर्व नागरिकांना तसेच सर्व कार्यालये, संस्था यांना विनंती करण्यात येते, की त्यांनी आपल्या कार्यालयात/आस्थापनेच्या आवारात विनाहेल्मेट दुचाकीवर प्रवेश करणाऱ्यास प्रतिबंध करावा. स्वतःच्या सुरक्षेच्या दृष्टिकोनातून सर्वांनी हेल्मेटचा वापर करावा."

किरण बिडकर, उपप्रादेशिक परिवहन अधिकारी, नंदुरबार