सिन्नर (नाशिक)- पारंपारीक पध्दतींना फाटा देत घोरवड (ता. सिन्नर) येथील प्रयागतिर्थावर अनोखा विवाहसोहळा पार पडला. लग्न मंडपात क्रांतीकारक, महापुरुष आणि आदिवासी बांधवांचे अधिकार या विषयांवरील पुस्तकांचे प्रदर्शन मांडण्यात आले होते. आद्यक्रांतिकारक राघोजी भांगरे ब्रिगेड अर्थात आदीम सामाजिक लोकचळवळीचे कार्यकर्ते संदीप गवारी यांनी स्वतःचे लग्न घोरवड (म्हसाळवाडी) येथील भारती काळु म्हसाळ यांच्यासोबत अनोख्या पध्दतीने केले.

विवाह सोहळा सुरु होण्याआधी वधु-वरांनी धरती मातेची पूजा केली. दुंदा घोयरत, भाऊ गवारी यांनी मांडव मंत्र म्हणत फुलांच्या वर्षावात संदीप आणि भारती विवाहबध्द झाले. महामित्र दत्ता वायचळे यांनी नवदांपत्याला भारतीय राज्यघटनेची प्रत भेट देऊन या अनोख्या विवाह सोहळ्याचे स्वागत केले. क्रांतीकारकांच्या प्रतिमांना अभिवादन करुन आदिवासी मांडव मंत्राच्या जयघोषात हा विवाह सोहळा रंगला.