सोनगीर : वडणे (ता. धुळे) गावाजवळील सरवड ते लामकानी मार्गावर येथील पोलिसांच्या गस्तीपथकाने कत्तलीच्या उद्देशाने गोवंशाची वाहतूक करणाऱ्या पिक-अप वाहनासह साडेतीन लाखांचा ऐवज जप्त केला.

ही घटना शुक्रवारी (ता. १३) पहाटे तीनच्या सुमारास घडली. या प्रकरणी अज्ञात चालकाविरोधात गुन्हा दाखल करण्यात आला. (Cattle transporter Pick up seized near Wadne Dhule News)

सूर्यकुमार...भारतीय क्रिकेट मधला 'लंबी रेस का...'

येथील गस्तीवरील पोलिसांना समोरून वेगाने पिक-अप (जीजे ०६, एजी ४६१९) येताना दिसले. पोलिसांनी वाहनचालकास थांबण्याचा इशारा दिला.

मात्र चालकाने न थांबता वाहन भरधाव पळविले. पोलिसांनी पाठलाग केला असता काही अंतरावर चालकाने वाहन सोडून अंधाराचा फायदा घेत पळ काढला. वाहनाची तपासणी केली असता लहान-मोठे नऊ गोवंश दाटीवाटीने कोंबलेली आढळले.

ते कत्तलीच्या उद्देशाने वाहून नेले जात असल्याचा पोलिसांना संशय आहे. या प्रकरणी पोलिसांत अज्ञात वाहनचालकाविरोधात गुन्हा दाखल झाला असून, ५८ हजार रुपयांची जनावरे व तीन लाखांचे वाहन असा तीन लाख ५८ हजारांचा ऐवज जप्त करण्यात आला. सहाय्यक पोलिस निरीक्षक गणेश फड, पोलिस नाईक ईश्वर सोनवणे, सूरज सावळे, नितीन जाधव यांनी ही कारवाई केली.