शिरपूर (जि. धुळे) : आजीच्या कर्करोगावरील उपचारासाठी घेतलेल्या पैशांच्या मोबदल्यात भरमसाट व्याज आणि मुद्दल वसूल केल्यानंतरही घरातील वस्तू उचलून घेऊन जाणाऱ्या २३ सावकारांविरोधात शहर पोलिस ठाण्यात गुन्हा दाखल करण्यात आला. पोलिस अधीक्षक प्रवीणकुमार पाटील यांनी अवैध सावकारांविरोधात मोहीम उघडली असतानाच शिरपुरात तब्बल २३ जणांविरोधात अवैध सावकारीचा गुन्हा दाखल झाल्याने खळबळ उडाली आहे. संशयितांमध्ये शिरपूरातील २२ तर पुणे येथील एकाचा समावेश आहे.

कुणाल हरीलाल जुलवाणी (वय २७) याने शहर पोलिसात याबाबत फिर्याद दिली. त्याच्या आजीला कर्करोग असल्यामुळे तिच्या उपचारासाठी त्याच्या वडिलांनी बँकेचे कर्ज काढले होते. कर्जाचे हप्ते थकल्यामुळे ते भरण्यासाठी त्यांना व्याजाने पैसे देणाऱ्या सावकारांची माहिती मिळाली. २०२० मध्ये त्याने संशयितांकडून वेळोवेळी पैसे घेतले. एकूण ३४ लाख पाच हजार रुपये घेतल्यानंतर त्याची परतफेड ऑनलाइन व रोखीने करुन संशयितांना तब्बल ४९ लाख ४३ हजार रुपये परत केले. मात्र त्यानंतरही थकबाकी असल्याचे दाखवून संशयित कुणालच्या घरातून लॅपटॉप, स्पीकर, लाऊडस्पीकर, मोबाईल अ‍ॅसेसरिज असे साहित्य उचलून घेऊन गेले. थकबाकी वसूल करण्यासाठी त्यांच्याकडून स्टँप पेपरवर लिहून घेणे, सह्या केलेले कोरे धनादेश घेणे असे प्रकारही त्यांनी केले. कुणालचे वडील शिक्षक असून, त्यांच्या शाळेवर जाऊन धमकी दिली. त्याचे काका गोपाल मारवाडी यांच्या दुकानावर जाऊन धुमाकूळ घातला. अखेर जुलवाणी यांनी कंटाळून शिरपूर शहर पोलिस ठाण्यात फिर्याद दिली.

हे आहेत संशयित सावकार

संशयितांमध्ये मनोज गुलाबराव पाटील, उमेश संतोष पाटील, विवेक शिरीष पाटील, निश्चय योगेंद्र ललवाणी, जगदीश राजेंद्रसिंह गिरासे, किरण पांडुरंग मराठे, शशीपाल चंद्रसिंह जमादार, रुद्रसिंह सुभाषसिंह राजपूत, सागर वसंत माळी, चेतन रवींद्र पाटोळे, कृष्णा कुबेर पारधी, रवींद्र हिरामण खजुरे, राहुल नारायण झांजरे, भूषण गोपाल पाटील, चेतन सुभाष माळी, अमोल गोपाल सोनवणे, अविनाश राजू बैसाणे, संजय पाटील, महेश कोळी, रोहित भोई, सागर मधुकर मराठे, सागर भाटपुरे (सर्व रा.शिरपूर) व रोहन राजू राऊत (रा.पुणे) यांचा समावेश आहे.