धुळे : चारचाकी वाहनांची बॅटरी चोरी करणाऱ्या टोळीचा धुळे तालुका पोलिस ठाण्याचे पोलिस निरीक्षक अभिषेक पाटील यांच्यासह पथकाने पर्दाफाश केला. टोळीतील एकास अटक करून त्याच्याकडून एकूण १२ बॅटरी हस्तगत केल्या. धुळे ते चाळीसगाव रोडवरील विंचूर गाव शिवारात रस्त्यावर पार्किंग केलेले काँक्रिट मिक्सर या वाहनाच्या १८ हजार रुपये किमतीच्या दोन बॅटरी चोरट्याने लंपास केल्या. १२ ते २५ सप्टेंबरदरम्यान ही चोरी झाली. (Action of taluka police bust gang stealing vehicle batteries)

याबाबत जितेंद्र प्रसाद यांच्या तक्रारीवरून धुळे तालुका पोलिस ठाण्यात गुन्हा नोंद झाला. या गुन्ह्याचे गांभीर्य लक्षात घेऊन पोलिस निरीक्षक पाटील यांनी तपासाची सूत्रे हाती घेतली. तसेच किशोर खैरनार, कुणाल पानपाटील, उमेश पवार, ललित खळगे, मनोज शिरसाठ, विशाल पाटील, धीरज सांगळे यांच्या पथकाला गोपनीय माहिती काढण्याच्या सूचना दिल्या.

पोलिस अधीक्षक श्रीकांत धिवरे, अपर पोलिस अधीक्षक किशोर काळे, उपविभागीय पोलिस अधिकारी साजन सोनवणे यांच्या मार्गदर्शनाखाली तपासाची चक्रे जलद गतीने फिरविली. यात शकिल शेख सलीम शेख ऊर्फ शकिल सेंधवा (वय ३८, रा. बाबानगर, नटराज टॉकीजसमोर, ऐंशीफुटी रोड, धुळे) याला ताब्यात घेतले. चौकशीदरम्यान त्याने गुन्ह्याची कबुली दिली. तसेच गुन्ह्यातील १८ हजार रुपये किमतीच्या दोन बॅटरीही काढून दिल्या.

अन्य गुन्ह्यांची कबुली

पोलिस ठाण्यात दाखल अन्य एका गुन्ह्याचीदेखील त्याने कबुली देत चोरलेल्या १५ हजारांच्या दोन बॅटरी काढून दिल्या. दरम्यान, संशयित शकिल शेख सलीम शेख ऊर्फ शकिल सेंधवा याने त्याच्या साथीदारांसह विविध ठिकाणांवरून चारचाकी वाहनातून बॅटरी चोरीच्या गुन्ह्यांचीही कबुली दिली. त्याच्याकडून एकूण १२ बॅटरी हस्तगत करण्यात आल्या. त्याने गुन्हा करतेवेळी वापरलेले चारचाकी वाहन (ह्युन्डई अ‍ॅसेंट कार) व अन्य साथीदारांचा धुळे तालुका पोलिस तपास घेत आहेत.