Dhule News : राज्य शासनाने मुद्रांक शुल्क व दंड माफी सवलत अभय योजना २०२३ लागू केली आहे. या योजनेचा पहिला टप्पा २९ फेब्रुवारीला समाप्त होणार आहे. त्यासाठी शनिवारी (ता. २४) आणि रविवारी (ता. २५) या शासकीय सुटीच्या दिवशी येथील सह जिल्हा निबंधक वर्ग- १ तथा मुद्रांक जिल्हाधिकारी कार्यालय, तसेच जिल्ह्यातील सर्व सह दुय्यम निबंधक कार्यालये सुरू राहणार असल्याची माहिती मुद्रांक जिल्हाधिकारी राजेंद्र गायकवाड यांनी दिली. (Avail Stamp Duty Abhay Yojana Gaikwads appeal)

जिल्ह्यात २९ फेब्रुवारीपर्यंत योजनेत सहभाग नोंदविल्यास थकलेल्या मुद्रांक शुल्कावर २५ टक्के व त्यावरील दंडाच्या रक्कमेवर ९० टक्के माफी शासनाने दिली आहे. तसेच १ ते ३१ मार्च या कालावधीत सहभाग नोंदविल्यास थकलेल्या मुद्रांक शुल्कावर २० टक्के व त्यावरील दंडाच्या रक्कमेवर ८० टक्के माफी राहणार आहे.

कार्यालये खुली राहणार

ज्या पक्षकार किंवा नागरिकांकडे मुद्रांक शुल्काची रक्कम थकीत आहे त्यांना अभय योजना २०२३ चा पहिला टप्पा म्हणजेच २९ फेब्रुवारीपर्यंत थकलेल्या मुद्रांक शुल्कावर २५ टक्के व त्यावरील दंडाच्या रक्कमेवर ९० टक्के माफीचा लाभ मिळणार आहे.

या योजनेचा लाभ देण्यासाठी शनिवारी व रविवारी शासकीय सुटीच्या दिवशी सह जिल्हा निबंधक वर्ग १ तथा मुद्रांक जिल्हाधिकारी कार्यालय, जिल्ह्यातील सर्व सह दुय्यम निबंधक कार्यालय सुरू राहणार आहेत.

लाभ घेण्याचे आवाहन

या दिवशी नागरिकांचे अर्ज स्वीकारणे, अभय योजनेतील प्रलंबित प्रकरणे, अर्ज निर्गत करणे व तद्अनुषंगिक कार्यवाही करण्यात येईल. या योजनेचा लाभ घेण्यासाठी पक्षकार किंवा नागरिकांनी विहित नमुन्यातील अर्ज २९ फेब्रुवारीपर्यंत या कार्यालयाकडे अथवा या कार्यालयाच्या अधिनस्त असलेल्या सहाय्यक दुय्यम निबंधक.

दुय्यम निबंधक कार्यालयांकडे सादर करून मुद्रांक शुल्क व दंडाच्या रक्कमेवर सवलतीनुसार रक्कम जमा करावी. तसेच शासनामार्फत सुरू असलेल्या अभय योजना २०२३ अंतर्गत मुद्रांक शुल्क व दंड सवलत योजनेचा नागरिकांनी अधिकाधिक लाभ घ्यावा, असे आवाहन मुद्रांक जिल्हाधिकारी गायकवाड यांनी केले.