Dhule News : लोकसभेच्या धुळे मतदारसंघातील महायुतीमधील भाजपचे उमेदवार डॉ. सुभाष भामरे यांनी सोमवारी (ता. २९) उमेदवारी अर्ज दाखल केला. त्यात त्यांच्या शपथपत्रानुसार पती-पत्नीच्या नावे सुमारे १५ कोटी ६७ लाख ८१ हजार ५४८ रुपयांची स्थावर, जंगमसह स्व-मालमत्ता दर्शविण्यात आली आहे. (Dhule Candidate Dr. Subhash Bhamre owns Rs 15 crore)

एकूण दर्शविलेल्या १५ कोटी ६७ लाखांच्या रकमेत डॉ. भामरे यांच्या नावे सुमारे सात कोटी २० लाख १३ हजार ९६९ रुपये, तर पत्नीच्या नावे आठ कोटी ४७ लाख ६७ हजार ५७९ रुपयांचा समावेश आहे. डॉ. भामरे यांच्यावर साक्रीत एक गुन्हा दाखल असून, त्यात दोषारोप नाहीत.

त्यांच्याकडे खेडे (ता. धुळे) येथे प्रत्येकी सहा एकरचे दोन तुकडे, न्याहळोद (ता. धुळे) येथे पंधरा एकर शेतजमीन आहे. (Latest Marathi News)

एकूण दर्शविलेल्या पंधरा कोटींवर रकमेत २७ लाख २१ हजार ४९८ किमतीचे जडजवाहीर, सोने-चांदी, तर २८ हजारांचे हिरे समाविष्ट आहेत.

तसेच त्यात बँकेतील काही ठेवींसह डॉ. भामरे यांच्या हाती सहा लाख ८४ हजार, तर त्यांच्या पत्नीच्या हाती आठ लाखांची रोख रक्कम आहे. डॉ. भामरे यांच्याकडे दोन कार असल्याची नोंद शपथपत्रात आहे.