Dhule Crime : शहरात गांजाची विक्री करण्यासाठी फिरणाऱ्या गोव्यातील संशयित तरुणाला स्थानिक गुन्हे अन्वेषण शाखेच्या पथकाने अटक केली. त्याच्याकडून मुद्देमाल जप्त केला. ही कारवाई शुक्रवारी (ता. १२) सकाळी केली. या प्रकरणी दोघांविरुद्ध गुन्हा दाखल केला. ‘एलसीबी’चे पोलिस निरीक्षक जयपाल हिरे यांना प्राप्त माहितीच्या आधारे पथकाने शहरातील चाळीसगाव रोड चौफुलीवरून सोनू अनिल चौधरी (वय २९, रा. सिद्धार्थनगर, उत्तर प्रदेश व ह.मु. म्हापसा, गोवा) या संशयिताला पकडले. (Dhule Crime)

त्याच्याकडील बॅगेची तपासणी केली असता त्यात मानवी मेंदूवर घातक परिणाम घडवून आणणारा गांजा मिळून आला. पोलिसांनी २६ हजार ४०० रुपयांचा दोन किलो २०० ग्रॅम गांजा व पाच हजारांचा मोबाईल जप्त केला.

चौकशीत त्याने शंकर खरे (रा. सेंधवा, मध्य प्रदेश) याच्याकडून गांजा विकत घेऊन विक्रीसाठी आणल्याची कबुली दिली. या प्रकणी तुषार सूर्यवंशी यांच्या फिर्यादीवरून दोघांविरुद्ध मोहाडी पोलिस ठाण्यात गुन्हा दाखल झाला.

पोलिस अधीक्षक श्रीकांत धिवरे, अपर पोलिस अधीक्षक किशोर काळे यांच्या मार्गदर्शनाखाली ‘एलसीबी’चे पोलिस निरीक्षक हिरे, सहाय्यक पोलिस निरीक्षक श्रीकृष्ण पारधी, योगेश राऊत, संदीप सरग, प्रकाश सोनार, तुषार सूर्यवंशी, हेमंत बोरसे, बापू वाघ, योगेश चव्हाण, संदीप पाटील, योगेश जगताप, सुशील शेंडे, कैलास महाजन यांच्या पथकाने ही कारवाई केली.