साक्री : येथील राष्ट्रीय महामार्गालगत साक्री-दहिवेल मार्गावर असणारे त्रिमूर्ती ॲग्रो सर्व्हिसेस हे बियाणे विक्री दुकान चोरट्याने फोडत सुमारे एक लाख २५ हजार ४१६ रुपये किमतीचा मुद्देमाल लंपास केला. या घटनेबाबत दुकानमालक सचिन निंबा काकुस्ते यांनी पोलिसांत फिर्याद देत गुन्हा दाखल केला आहे. (Dhule Crime thieves broke into agro shop along national highway)

साक्री-दहिवेल मार्गावरील नवापूर रोडलगतच्या त्रिमूर्ती ॲग्रो सर्व्हिसेस नावाचे बियाणे विक्री दुकान चोरट्यांनी गुरुवारी (ता. २४) पहाटेच्या सुमारास लक्ष्य केले. चोरट्याचा दुकानातील प्रवेश दुकानातील सीसीटीव्हीत कैद झाला असून, गुरुवारी पहाटे तीन ते साडेतीनच्या दरम्यान अज्ञात व्यक्ती दुकानाच्या शटरचा पत्रा उचकावून आत प्रवेश करून दुकानातील बियाणे, औषधांची पाहणी करत असल्याचे त्यात दिसून आले.

तसेच दुकानातील एक लाख ११ हजार ४५६ रुपये किमतीचे राशी सीड्स व अजित सीड्स कंपनीचे कपाशीच्या बियाण्याची १२९ पाकिटे, सहा हजार ९६० रुपये किमतीचे आशा ॲग्रो सायन्स कंपनीचे मक्याच्या बियाण्याची चार पाकिटे तसेच गल्ल्यातील सात हजारांची रोकड असा सुमारे एक लाख २५ हजार ४१६ रुपये किमतीचा ऐवज चोरट्याने लंपास केला. (latest marathi news)

याबाबत दुकानमालक सचिन काकुस्ते सकाळी दुकानात आल्यानंतर त्यांना हा प्रकार लक्षात आला. त्यांनी याबाबत पोलिसांना कळविल्यानंतर पोलिसांनी घटनास्थळी भेट दिली. तसेच श्वानपथकाच्या मदतीनेदेखील चोरट्यांचा माग काढण्याचा प्रयत्न केला. याबाबत श्री. काकुस्ते यांच्या फिर्यादीनुसार पोलिसांत गुन्हा दाखल करण्यात आला आहे.