Dhule News : शहरातील मालमत्तांना सुधारित कर आकारणीच्या प्रक्रियेंतर्गत शहरातील चाळीसगाव रोड व पेठ भागातील मालमत्ताधारकांकडून प्राप्त सुनावणींवर महापालिकेत १ जूलैपासून सुनावणी सुरू झाली. गेल्या दोन दिवसांत ७३९ हरकतदार सुनावणीला हजर राहिले, २६१ हरकतदारांनी सुनावणीला दांडी मारली. धुळे महापालिकेतर्फे महापालिका हद्दीतील सर्व मालमत्तांना करयोग्य मूल्यनिश्‍चितीची (सुधारित कर आकारणी) प्रक्रिया सुरू आहे. प्रारंभी हद्दवाढ क्षेत्रात ही प्रक्रिया पूर्ण झाली. ( Hearing on 739 objections in 2 days Procedure for revised taxation of properties)

त्यानंतर देवपूर व साक्री रोड भागासाठी प्रक्रिया राबविण्यात आली. पेठ भाग व चाळीसगाव रोड भागाची प्रक्रिया बाकी होती. मध्यंतरीच्या काळात लोकसभा निवडणुकीमुळे या प्रक्रियेला ब्रेक लागला. दरम्यान, १ जुलैपासून या दोन्ही भागांतील प्रक्रियेला सुरवात करण्यात आली आहे. अर्थात या भागातून प्राप्त हरकतींवर सुनावणी घेण्यात येत आहे. पेठ भाग व चाळीसगाव रोड या दोन्ही भागांत एकूण ३९ हजार ४०० मालमत्ताधारक आहेत. यातील २६ हजार ७० मालमत्ताधारकांना सुधारित कर आकारणीच्या नोटिसा देण्यात आल्या. (latest marathi news)

या नोटिसांवर हरकती मागविण्यात आल्या. मुदतीअंती एकूण पाच हजार १४७ हरकती प्राप्त झाल्या. या हरकतींवर १ जुलैपासून महापालिकेत सुनावणी सुरू झाली. महापालिका आयुक्त तथा प्रशासक अमिता दगडे-पाटील यांच्या निर्देशानुसार अतिरिक्त आयुक्त करुणा डहाळे, उपायुक्त संगीता नांदूरकर, उपायुक्त शोभा बाविस्कर, उपायुक्त हेमंत निकम, सहाय्यक आयुक्त समीर शेख, वसुली अधीक्षक शिरीष जाधव, वसुली अधीक्षक मधुकर निकुंभे आदी सुनावणी घेत आहेत.

७३९ हरकतदार हजर

रोज ५०० हरकतदारांना सुनावणीसाठी बोलविण्यात येत आहे. १ जुलैला ३७७ व २ जुलैला ३६२ असे एकूण ७३९ हरकतदार सुनावणीसाठी हजर राहिले. २६१ हरकतदारांनी मात्र सुनावणीला दांडी मारली. दरम्यान, ज्या हरकतींवर सुनावणी झाली, त्यातील ११८ हरकतींच्या अनुषंगाने स्पॉट व्हेरिफिकेशनचा निर्णय घेण्यात आला. स्पॉट व्हेरिफिकेशननंतर संबंधितांच्या तक्रारींवर योग्य निर्णय होईल.