Dhule News : आपल्या विविध मागण्यांसाठी महसूल कर्मचाऱ्यांनी सोमवारपासून (ता. १५) बेमुदत बंदचे हत्यार उपसले आहे. त्याचा फटका रेशनकार्डावरील नाव कमी करणे, वाढविणे, दुरुस्ती करणे, उत्पन्नाचे दाखले आदी दैनंदिन कामांना बसला. तथापि, बंदमुळे महसूल कार्यालयात शुकशुकाट दिसून आला. मागण्यांसाठी रस्त्यावर उतरून महसूल कर्मचाऱ्यांनी आवाज बुलंद केला. याआधी काळ्याफिती, निदर्शने, लेखणीबंद आंदोलन झाले होते. (Indefinite strike of revenue employees marathi news)

महसूल आकृतिबंध समितीच्या अहवालातील शिफारशीनुसार कोणत्याही संवर्गातील कर्मचारी कपात न करता लागू करण्यात यावा, मराठवाडा विभागातील अव्वल कारकून, मंडळ अधिकारी संवर्गातील नायब तहसीलदारपदी तत्काळ पदोन्नती द्यावी.

महसूल विभागाचा आकृतिबंध त्वरित लागू करावा, नायब तहसीलदार संवर्ग असूनही वेतन श्रेणी वर्ग-तीन संवर्गाची देण्यात आली आहे, ती बदल करून चार हजार ८०० रुपये करावी. कर्मचाऱ्यांचे वेतन नियमितपणे प्राधिकारपत्रावर काढण्याबाबत शासन निर्णय निर्गमित करावा. (latest marathi news)

महसूल साहाय्यक, तलाठी ही पदे जिल्हास्तरीय व समकक्ष अर्हताधारी असताना महसूल साहाय्यक यांचा ग्रेड-पे एक हजार ९०० व तलाठी यांचा ग्रेड दोन हजार ४०० आहे. त्यामुळे महसूल साहाय्यकांचा ग्रेड पे दोन हजार ४०० करावा आदी मागण्यांसाठी महसूल कर्मचारी संपावर आहेत.

संघटनेचे जिल्हाध्यक्ष सुरेश पाईकराव, कार्याध्यक्ष संजय जगताप, उपाध्यक्ष किशोरी हरणे, सरचिटणीस योगेश जिरे, कोशाध्यक्ष उमेश नाशिककर, जिल्हा संघटक महेश वाडिले, अभय कुलकर्णी, युवराज केदार, रोहिदास कोळी, दीपक महाले, जयंत पाटील, भटू बोरसे, गंगेश्वर गवळी, संजय सोनवणे, कुंदन चव्हाण, संतोष चौधरी, नीलेश मोरे, मोसीम पिंजारी, सुभाष गिरी, विद्या साळवे, एस. बी. बहिरम, कबीरदास सरकुंडे, चैत्रास सासके, महादेव पवार आदी आंदोलनात सहभागी आहेत.