Dhule Lok Sabha Election 2024 : लोकसभेच्या धुळे मतदारसंघाचा सर्वांगिण विकास साधताना रोजगारनिर्मितीला प्राधान्य दिले जात आहे. त्यासाठी औद्योगिकीकरणाचा वेग वाढविण्यासाठी प्रयत्नशील आहे. त्याचबरोबर विकासाचे पुरक प्रकल्प अंमलबजावणीत आणून मतदारसंघाचा चेहरामोहरा बदलण्यासाठी झोकून काम करेल, अशी भूमिका भाजपचे उमेदवार डॉ. सुभाष भामरे यांनी मांडली. (Dhule Lok Sabha Election 2024 Candidate Dr bhamare news)

धुळे लोकसभा मतदारसंघातील भारतीय जनता पक्ष महायुतीचे उमेदवार डॉ. भामरे यांच्या प्रचारार्थ शिंदखेडा मतदारसंघातील जिल्हा परिषद गटनिहाय गावांमध्ये प्रचार रॅली, कॉर्नर सभा, जाहीर सभा झाली. त्यास उत्स्फूर्त प्रतिसाद मिळत आहे. पंतप्रधान नरेंद्र मोदी यांच्या नेतृत्वात तिसऱ्यांदा केंद्रात सरकार स्थापन होण्यासाठी उमेदवार डॉ. भामरे यांना मताधिक्याने हॅट्रीकसह संसदेत पाठविण्याचे आवाहन मान्यवरांकडून झाले.

माजी मंत्री तथा आमदार जयकुमार रावल, डॉ. भामरे, सहकारमहर्षी सरकारसाहेब रावल, लोकसभा समन्वयक नारायण पाटील, जिल्हा परिषदचे माजी सभापती कामराज निकम, प्रा. डी. एस. गिरासे, प्रवीण महाजन, डी. आर. बोरसे, दीपक बागल, जिजाबराव पाटील, आदींसह त्या- त्या गावांतील पदाधिकारी, कार्यकर्ते व ग्रामस्थ उपस्थित होते.

आमदार रावल म्हणाले, की पंतप्रधान मोदी यांनी मजबूत राष्ट्र बनविण्यासाठी दहा वर्षांत विविध धाडसी निर्णय घेतले. ते अमलात आमले. पायाभूत सुविधांचे बळकट जाळे निर्माण केले. जागतिक स्तरावर देशाची वेगळी ओळख निर्माण केली. २०१४ पूर्वी अकराव्या क्रमांकावर असलेली आर्थिक स्थिती सुधारून पाचव्या क्रमांकाव आणली. काही देशविघातक शक्तींना मोदी नकोत. त्यामुळे देशवासीयांची विविध मुद्यांवरून दिशाभूल केली जात आहे. भूलथापांनना बळी न पडता मतदारांनी पुन्हा भाजप-महायुती उमेदवाराच्या पाठीशी राहावे. (latest marathi news)

विकास कामांना प्राधान्य

उमेदवार डॉ. भामरे म्हणाले, की पंतप्रधान मोदी यांच्या नेतृत्वात धुळे लोकसभा मतदारसंघातील विविध प्रलंबित प्रश्न, प्रकल्प मार्गी लावण्यास प्राधान्य दिले. सुलवाडे- जामफळ- कनोली उपसा सिंचन योजना शेतकरी हितासाठी मार्गी लावली. त्यात ८० टक्के काम पूर्णत्वास आले असून अंतिम कामानंतर धुळे, शिंदखेडा तालुक्यातील सिंचनासह पिण्याच्या पाण्याचा प्रश्न निकाली निघेल.

येत्या दीड वर्षात ही गावे सुजलाम-सुफलाम होतील. धुळे- नरडाणा रेल्वेमार्गाचे काम आचारसंहितेनंतर सुरू होणार आहे. मतदारसंघात सात राष्ट्रीय महामार्ग बनविण्यात यश आले. तसेच आगामी काळात धुळे मतदारसंघात या पायाभूत सुविधांमुळे औद्योगीकरणाला वेग येणार असून, दिल्ली-मुंबई इंडस्ट्रीअल कॉरिडॉच्या दुसऱ्या टप्प्यात धुळे जिल्ह्याचा समावेश झाल्याने अन्नप्रक्रिया, इथेनॉल तसेच टेक्स्टाइल पार्कही सुरू होणार आहेत.

त्यामुळे रोजगारनिर्मिती होईल. मतदारसंघाच्या सर्वांगीण विकासासाठी पुन्हा एकदा खासदारकीची संधी द्यावी, असे आवाहन डॉ. भामरे यांनी केले. नारायण पाटील, कामराज निकम आदी भाजप पदाधिकाऱ्यांनी मोदी व डॉ. भामरे यांच्या कारकिर्दीत झालेल्या विकासकामांचा लेखाजोख मांडला.