Dhule News : येथील गेल्या ६० वर्षांपासून प्रलंबित प्रश्न असलेला बसस्थानक परिसरातील अतिक्रमण साक्री येथील उपविभागीय कार्यकारी अभियंता विनोद वाघ यांच्या नेतृत्वखाली नुकतेच काढण्यात आले. त्यामुळे खऱ्या अर्थाने हा परिसर मोकळा श्वास घेत आहे. गावातील ग्रामस्थांनी याबद्दल समाधान व्यक्त केले. (Dhule Encroachment land demolition in Dusane bus stand area)

विहीरगाव ते सुकवद रस्त्याचे काम दोन वर्षांपासून सुरू होते. यामध्ये दुसाणे ते विहीरगाव फाटा हे सात किलोमीटर रस्त्याचे काम अत्यंत जलदगतीने सुरू होते; परंतु दुसाणे बसस्थानक परिसरातील अतिक्रमण खूप प्रमाणात वाढले होते.

दोन वाहनेसुद्धा जाऊ शकत नव्हती, तसेच याच परिसरातच, प्राथमिक, माध्यमिक, जिल्हा परिषद शाळा आहेत. साधारणपणे एक हजार ५०० च्या जवळपास विद्यार्थी शिक्षण घेतात. गावातून शाळेत येण्यासाठी हाच एकमेव रस्ता होता.

गेल्या वर्षभरापासून शासकीय नियमानुसार संबंधित व्यापाऱ्यांना नोटिसा देण्यात आल्या होत्या; परंतु अतिक्रमण काढत नव्हते. शेवटी साक्री येथील बांधकाम विभागाचे उपविभागीय अधिकारी विनोद वाघ यांच्या मार्गदर्शनाखाली परिसरातील २५ ते ३० मीटर रस्त्याचे अतिक्रमण जेसीबीने काढण्यात आले.

हे अतिक्रमण सिटी सर्व्हेच्या नकाशाप्रमाणे काढण्यात आले. अधिकारी विनोद वाघ, राकेश पाटील, दीपक फड, हर्शल पाटील, मनोज कुवर, भोई, देशपांडे, तसेच निजामपूर पोलिस ठाण्याचे एपीआय गायकवाड व त्यांच्यासोबत २५ ते ३० पोलिसांचा मोठा बंदोबस्त होता.

गावातील ग्रामस्थ व तरुण मंडळीने अतिक्रमण काढण्यासाठी सहकार्य केले. कोणत्याही प्रकारची हुज्जत अधिकाऱ्यांशी कोणी घातली नाही. परिसरात रस्त्याच्या दोनही बाजूला मोठी गटार येणार आहे व रस्त्याचे काँक्रिटीकरण केले जाणार आहे. यामुळे दुसाणेच्या गावप्रवेशाची शान वाढणार आहे.