सोनगीर : जैताणे (ता. साक्री) येथे प्रेयसीला भेटायला गेलेल्या प्रियकरास मुलीच्या नातेवाइकांनी बेदम मारहाण केली. यात उपचारांदरम्यान त्याचा शुक्रवारी (ता. २०) मृत्यू झाला. या प्रकरणी चार संशयितांवर गुन्हे दाखल असून, तिघांना अटक करण्यात आली आहे. युवकाच्या मृत्यूने संतप्त आदिवासी भिल्ल समाजाने घटनेचा टायर जाळून निषेध करीत शनिवारी (ता. २१) रास्ता रोको आंदोलन केले. यामुळे गावात तणाव निर्माण झाल्याने व्यापाऱ्यांनी दुकाने, व्यवहार बंद केले. अजय भवरे (वय २०, रा. भिलाटी, जैताणे) असे मृताचे नाव आहे. (youth was beaten to death 4 suspects have been charged have been arrested )

भवरे हा बुधवारी (ता. १८) पहाटे त्याच्या प्रेयसीला भेटायला गेला. तिच्याशी गप्पा मारत असताना तुकाराम शिंदे, वैभव शिंदे, रावसाहेब शिंदे, रवींद्र धनगर यांनी त्यास पकडले. त्याला जातिवाचक शिवीगाळ करीत लाथा-बुक्क्यांनी व काठीने मारहाण केली. हाताला व डोक्याला गंभीर दुखापत झाल्याने त्याला उपचारांसाठी दाखल करण्यात आले. उपचार सुरू असताना अजयचा शुक्रवारी सायंकाळी मृत्यू झाला. या प्रकरणी राजेंद्र भवरे यांनी निजामपूर पोलिस ठाण्यात फिर्याद दिली असून, चार संशयितांवर खुनाचा गुन्हा दाखल झाला आहे. तुकाराम शिंदे, रावसाहेब शिंदे व रवींद्र धनगर या तिघांना अटक झाली. दरम्यान, शनिवारी सकाळी मृताच्या नातेवाईक व समाजबांधवांनी पोलिस ठाण्यासमोर गर्दी करीत ‘संशयितांना आमच्यासमोर आणा’ अशी मागणी केली. (latest marathi news)

तत्पूर्वी, टायर जाळून रास्ता रोको आंदोलन केले. तणावपूर्ण परिस्थितीमुळे गावातील व्यवहार बंद झाले. घटना समजताच उपविभागीय पोलिस अधिकारी संजय बाबळे, निजामपूर पोलिस ठाण्याचे सहाय्यक निरीक्षक मयूर भामरे, उपनिरीक्षक प्रदीप सोनवणे व कर्मचाऱ्यांनी घटनास्थळी धाव घेत आंदोलकांची समजूत काढण्याचा प्रयत्न केला. खुनाचा गुन्हा दाखल झाला असून, संशयितांना ताब्यात घेण्यात आले आहे. त्यामुळे कोणीही कायदा व सुव्यवस्था हातात घेऊ नये, शांतता ठेवावी, असे आवाहन केले. दरम्यान, तणावाची परिस्थिती पाहता व विद्यार्थ्यांची सुरक्षितता लक्षात घेता जैताणे येथे शाळा सोडून देण्यात आली.