साकोरा : येथिल शेतकरी सुनिल बाजीराव बोरसे (51) यांनी सततची नापिकी, यावर्षी अत्यल्प झालेल्या पावसाने केलेला खर्च वसूल होणार नसल्याने तसेच सावकारी कर्जाला कंटाळून आज सकाळी नांदगाव रेल्वेस्थानक ते रेल्वे गेट दरम्यान रेल्वेखाली उडी घेवून आपली जीवनयात्रा संपविली.

याबाबत सविस्तर माहिती अशी की, एक महिन्यांपूर्वी साकोरा येथिल मच्छिंद्र बोरसे या तरून शेतकऱ्याने रेल्वेखाली उडी घेवून आत्महत्या केली होती. ही घटना ताजी असतानाच आज सकाळी पून्हा साकोरा येथिल शेतकरी सुनिल बोरसे याने भुसावळ कडे जाणार्‍या रेल्वेखाली उडी घेवून आत्महत्या केली. नांदगाव तालुक्यात यावर्षी सर्वात कमी पाऊस झाला असून आपल्या उपजीविकेचे साधन म्हणून शेतीत दुबार पेरणी करूनही डोळ्यासमोर पीक जळत असल्याचे पाहून त्यासाठी दोन लाख रुपये खाजगी कर्ज कसे फेडायचे त्याचप्रमाणे गेल्या वर्षी मुलीचे लग्न झाले. या सर्व कारणामुळे बोरसे यांनी आपली जीवनयात्रा संपविली. त्यांच्या पश्चात पत्नी, दोन मुले, वृद्ध आई-वडील असा परिवार आहे.