धुळे : महिला व बालविकास विभागामार्फत १६ ते ६० वर्षे वयोगटातील निराश्रित, परितक्त्या, कुमारी माता, लैंगिक अत्याचार अथवा संकटग्रस्त महिलांना आश्रय देऊन त्यांच्या पुनर्वसनासाठी शासकीय महिला राज्य गृहे स्थापन झाली आहेत. जिल्ह्यात शासकीय ममता महिला वसतिगृह कार्यरत आहे. त्याचा गरजू महिलांनी लाभ घ्यावा, असे आवाहन जिल्हा महिला व बालविकास अधिकारी सचिन शिंदे यांनी केले.

वसतिगृहात प्रवेशासाठी महिलांना अधीक्षकांकडे अर्जाव्दारे प्रवेश घेता येईल. सामाजिक कार्यकर्ते, स्वयंसेवी संस्था किंवा पोलिसांमार्फत वसतिगृहात दाखल होता येईल. या वसतिगृहांमध्ये महिलांना अन्न, वस्त्र व निवाऱ्याची सुविधा उपलब्ध करुन देण्यात येते. आवश्यकतेनुसार वैद्यकीय सेवा, महिलांना व्यवसाय प्रशिक्षणाची सुविधा, अविवाहित किंवा घटस्फोटित महिलांच्या विवाहासाठी संस्थेमार्फत प्रयत्न केले जातात. शिवाय कायदेविषयक मदत व सल्ला देण्यात येतो. तसेच लाभधारक महिलेच्या समवेत सहा वर्षांआतील लहान मूल/मुले असल्यास त्यांनाही वसतिगृहात प्रवेश देण्यात येतो.

महिला वसतिगृहात ३० दिवसांपेक्षा अधिक काळ राहिल्यास तिला वरील सुविधा व्यतिरिक्त सुधारित माहेर योजनेंतर्गत दरमहा हजार रोख अनुदान देण्यात येते. या महिलेबरोबर लहान मुले असल्यास पहिल्या मुलासाठी पाचशे रुपये व दुसऱ्या मुलासाठी चारशे रुपये रोख अनुदान देण्यात येते. ते वर्षासाठी अनुज्ञेय आहे. जिल्ह्यात शासकीय ममता महिला वसतिगृह म्हणून ही संस्था प्लॉट क्रमांक ११, आदर्शनगर, इंदिरा गार्डनजवळ, देवपूर, धुळे येथे कार्यरत असून गरजू महिलांनी लाभ घ्यावा. अधिक माहितीसाठी अधीक्षक आर. व्ही. बिरारी, दूरध्वनी- ०२५६२- २२६९०६ यांच्याशी संपर्क साधावा. संकटग्रस्त महिलांच्या मदतीसाठी १९०१ हा टोल फ्री क्रमांक असल्याचे विभागाने सांगितले.