Dhule Crime News : मुंबई-आग्रा महामार्गावरून होणारी गुटख्याची तस्करी धुळे स्थानिक गुन्हे शाखेने रोखत सुमारे ६५ लाखांचा गुटखा जप्त केला. सोनगीर (ता. धुळे) टोल नाक्यानजीक गुरुवारी (ता. २१) दुपारी साडेबारच्या सुमारास ही कारवाई केली.

कंटेनरसह ८५ लाखांचा मुद्देमाल जप्त करून चालकाला ताब्यात घेतले.(Gutkha worth 65 lakh seized from Songir by lcb dhule crime news)

राज्यात प्रतिबंधित गुटखा, पान मसाल्याची विक्रीच्या उद्देशाने मध्यप्रदेशातून तस्करी होत असल्याची माहिती पोलिस अधीक्षक श्रीकांत धिवरे यांना मिळाली. त्यानुसार ‘एलसीबी’चे पोलिस निरीक्षक दत्तात्रेय शिंदे यांना कारवाईचे आदेश दिले. माहितीची खातरजमा केल्यावर सोनगीर टोल नाक्याजवळील एका हॉटेलजवळ संशयित कंटनेर (एचआर ३८ ओसी ०४२२) उभा दिसला.

‘एलसीबी’ पथकाला चालकाने नरेशकुमार घनश्यामसिंग चौधरी (रा. मुरसाना, सहकारीनगर, जि. बुलंदशहर, उत्तर प्रदेश) असे नाव सांगितले. कंटनेरमधील मालाबाबत विचारपूस केली असता त्याने उडवाउडवीचे उत्तरे दिली. त्यामुळे कंटेनर पोलिस अधीक्षक कार्यालयाच्या आवारात आणले.

तपासणी केली असता त्यात राज्यात प्रतिबंधित गुटखा आढळला. ५६ लाख २५ हजार ९०० रुपयांचा शिखर पानमसाला, आठ लाख ८२ हजारांची एसएस-वन तंबाखू व २० लाखांचा कंटेनर, असा एकूण ८५ लाख सात हजार ९०० रुपयांचा मुद्देमाल जप्त केला. हा माल बंगळुरू (कर्नाटक) शहरात विक्रीसाठी नेला जात होता, अशी कबुली चालकाने दिली. पथकाने त्याला ताब्यात घेत सोनगीर पोलिस ठाण्यात गुन्हा दाखल केला.

पोलिस अधीक्षक श्रीकांत धिवरे, अपर पोलिस अधीक्षक किशोर काळे यांच्या मार्गदर्शनाखाली एलसीबीचे पोलिस निरीक्षक दत्तात्रेय शिंदे, गणेश फड, श्याम निकम संजय पाटील, संदीप सरग, प्रकाश सोनार, हेमंत बोरसे, मच्छिंद्र पाटील, संतोष हिरे, संदीप पाटील, अशोक पाटील, प्रल्हाद वाघ, तुषार सूर्यवंशी, सुरेश भालेराव, राहुल गिरी, कमलेश सूर्यवंशी, जितेंद्र वाघ, जगदीश सूर्यवंशी, महेंद्र सपकाळ, गुणवंत पाटील यांच्या पथकाने ही कारवाई केली.