कापडणे : गेल्या खरीप हंगामाच्या उत्तरार्ध सातत्यपूर्ण पाऊस झाला. नदीनाले डिसेंबरपर्यंत वाहिलेत. अद्यापही विहिरींची पाणी पातळी बऱ्यापैकी टिकून आहे. शेतकरी कापूस लागवडीसाठी लगीनघाई करीत आहे. मात्र कृषी विभागाने एक जून नंतरच कापूस लागवडीचे फर्मान काढले आहे. शेतकऱ्यांनी शेती मशागत करून लागवडीसाठी ठिबक अंथरूण तयारी पूर्ण केली आहे. दोन जूनपासून कापसाची लागवड करणार असल्याचे शेतकऱ्यांनी सांगितले.

ठिबक असूनही कापूस लागवड नाही

कमी पाण्यातही ठिबकने प्रती शेतकरी हेक्टर दोन हेक्टर कापसाची लागवड करून अधिक उत्पादन घेण्याचा प्रयत्न करीत असतो. यासाठी मे च्या उत्तरार्धाची लागवड फायदेशीर ठरत असते. यावर्षी कृषी विभागाने बोंडअळीचा प्रादुर्भाव रोखण्यासाठी एक जून नंतरच लागवड करण्याचे फर्मान काढल्यानंतर कृषी विभागाची अंमलबजावणी करताना शेतकरी दिसत आहे. यावर्षी विहिरी व कूपनलिकांची पाणी पातळीही चांगली टिकून आहे. ठिबकने मोठे क्षेत्र लागवडीखाली येणार आहे. ठिबकने विक्रमी कापूस उत्पादन घेण्याकडे शेतकऱ्यांचा कल वाढला आहे.

''शेतकऱ्यांनी ठिबक शेती केली पाहिजे. परिसरात मोठ्या प्रमाणात ठिबक व तुषार सिंचनचा वापर होत आहे. ओलिता खालील क्षेत्र वाढले आहे. शासकीय सिंचन अनुदानामुळे सिंचनाखाली शेतीचा टक्का मोठा वाढला आहे.'' - भागवत पाटील, संचालक श्री समर्थ कृपा इरिगेशन, कापडणे