पिंपळनेर (जि. धुळे) : लखाळे पो. वार्सा (ता. साक्री) येथे ३५ वर्षीय महिलेने घरात जेवण बनविले नाही, या गोष्टीचा राग पतीला आल्याने लाकडी दांडक्याने मारहाण करून तीस ठार मारले. ही घटना मंगळवारी (ता. १२) रात्री साडेआठच्या दरम्यान घडली. पिंपळनेर पोलिसांत पतीविरुद्ध ठार मारण्याचा गुन्हा नोंदविण्यात आला आहे. (Latest Marathi News)

लखाळे (पो. वार्सा) येथील निर्मला चव्हाण यांनी मंगळवारी रात्री साडेआठला घरात जेवण बनविले नाही, त्या गोष्टीचा तिचा पती गणेश एकनाथ चव्हाण (वय २९, मूळ रा. ताहाराबाद, महादेव मंदिरजवळ, ता. बागलाण, जि. नाशिक) यास राग आल्याने त्याने लाकडी दांडक्याने निर्मला हीच्या डोक्यावर व तोंडावर मारहाण करून गंभीर दुखापत करून ठार मारले. ही घटना पिंपळनेर पोलिसांना समजताच ते घटनास्थळी दाखल झाले. जखमी निर्मला हीस पिंपळनेर ग्रामीण रुग्णालयात उपचारार्थ दाखल केले असता, डॉक्टरांनी तपासून मृत घोषित केले. मृत निर्मला हीस चार मुले असून, त्यात आदित्य (वय १०), विजय (७), मुलगी साक्षी (३) व मुलगा पृथ्वी हा तीन महिन्यांचा आहे. सुरमल पवार यांच्या फिर्यादीवरून पिंपळनेर पोलिसांत गुन्हा नोंदविण्यात आला आहे. उपनिरीक्षक भाईदास मालचे तपास करीत आहेत.