धुळे : शहरातील नेहरू नगरात लॉज व कॅफेच्या नावाखाली देहविक्रीचा व्यवसाय चालविला जात आहे. या प्रकरणी चौकशीसह चालक व मालकाविरुद्ध गुन्हा दाखल करावा, अशी मागणी ज्योत्स्ना धनराज सनेर यांच्यासह नागरिकांनी केली. सामाजिक कार्यकर्त्या प्रभा परदेशी यांच्या नेतृत्वात रहिवाशांनी जिल्हा पोलिस अधीक्षक प्रवीणकुमार पाटील यांना निवेदन दिले.

देवपूरमधील नेहरूनगर, वाडीभोकर रोडलगत शनी मंदिराजवळ एक लॉज आहे. या परिसरात सुशिक्षित व शिक्षक वर्ग वास्तव्यास आहे. तसेच कॉलेज, हॉस्पिटल, स्पर्धा परीक्षेचे क्लासेस आहेत. स्थानिक रहिवाशांना ये- जा करण्याचा एकच मार्ग आहे. मात्र, संबंधित लॉज-कॅफेमध्ये चालक व मालक अल्पवयीन मुलींना आणून त्यांचे शारीरिक शोषण करीत आहेत. त्यांना देहविक्रीचा व्यवसाय करण्यास प्रवृत्त केले जाते. लॉज मालकाला समजविण्यास गेले असता त्याने महिला व ज्येष्ठ नागरिकांना शिवीगाळ करत धमकावून परतावून लावले. लॉज व कॅफेच्या चालकासह मालकाविरुद्ध गुन्हा दाखल करावा, अशी मागणी निवेदनाद्वारे करण्यात आली. पुरावा म्हणून निवेदनासोबत पोलिस अधीक्षकांना व्हिडिओ व फोटोची सीडी देण्यात आली.