Nandurbar Crime News : लक्कडकोट (ता. नवापूर) येथे नाकाबंदी करून उपविभागीय पोलिस अधिकारी संजय महाजन यांनी महिंद्र बोलेरोमधून अवैध मद्याची वाहतूक करताना वाहनासह १६ लाख ९३ हजार रुपये किमतीची अवैध दारू जप्त केली.(Illegal liquor and vehicle seized by police nandurbar crime news )

३० ऑक्टोबरला नंदुरबार उपविभागीय पोलिस अधिकारी संजय महाजन यांच्या पथकाने नवापूर पोलिस ठाणे हद्दीत लक्कडकोट रस्त्यावर करंजी खुर्द गाव येथे अचानक नाकाबंदी राबवून वाहनांची तपासणी करताना पांढऱ्या रंगाची महिंद्र बोलेरो पिक-अप वाहन येताना दिसले म्हणून पथकातील पोलिस अधिकारी व अंमलदारांनी टॉर्चच्या सहाय्याने वाहन थांबविण्याचा इशारा दिला, चालकाने वाहन न थांबविता भरधाव पुढे निघून गेला.

पथकाने बोलेरो वाहनाचा पाठलाग करून थांबवून पाहणी केली असता त्यात १४ लाख ७६ हजार ४० रुपये किमतीची देशी दारू व वाहन जप्त केले. तसेच सुरेश सरजा गावित (वय ३५, रा. सरी, ता. नवापूर) व सुनील रमेश गावित (२९, रा. धनबर्डी, ता. नवापूर) यांच्याविरुद्ध नवापूर पोलिस ठाण्यात महाराष्ट्र दारूबंदी कायद्यान्वये गुन्हा दाखल करण्यात आला.

स्थानिक गुन्हे शाखेचे पोलिस निरीक्षक किरणकुमार खेडकर यांच्या नेतृत्वाखाली त्यांच्या पथकाने नवापूर पोलिस ठाणे हद्दीतील नवापूर ते लक्कडकोट मार्गावर नीलेशकुमार गोपूभाई कोकणी (४०, रा. आंबा (निशालफळी), ता. सोनगड, जि. तापी, गुजरात) हा स्कूटीवर देशी-विदेशी दारूची विक्री करताना मिळून आल्याने त्याच्या ताब्यातून दोन लाख १७ हजार ८०० रुपये किमतीचे देशी-विदेशी मद्य व बियर असा मुद्देमाल हस्तगत करून त्याच्याविरुद्ध नवापूर पोलिस ठाण्यात गुन्हा दाखल करण्यात आला.

नवापूर पोलिस ठाण्याचे निरीक्षक ज्ञानेश्वर वारे यांच्या पथकाने नवापूर पोलिस ठाणे हद्दीत अवैध गावठी हातभभट्टीची दारू तयार करणारे व त्यांची विक्री करणाऱ्या पाच व्यक्तींविरुद्ध कारवाई करून त्यांच्याकडून २१ हजार ६०० रुपये किमतीचा मुद्देमाल हस्तगत करून त्यांच्याविरुद्ध नवापूर पोलिस ठाण्यात दारूबंदी कायद्यान्वये गुन्हा दाखल करण्यात आला.

नंदुरबार जिल्हा पोलिस दलाने नंदुरबार जिल्ह्याच्या सीमेलगत असलेल्या ठिकाणी आंतरराज्य नाकाबंदी केली असून, तेथे पोलिस अधिकारी व पोलिस अंमलदार तैनात करण्यात आले आहेत.

नाकाबंदीच्या ठिकाणी अधिकारी व अंमलदारांचे पथक २४ तास कार्यान्वित असून, गुजरातमार्गे राजस्थान व मध्य प्रदेशात जाणाऱ्या वाहनांची त्यांच्याकडून कडक तपासणी करण्यात येत आहे. अवैध दारूची चोरटी वाहतूक थांबविण्यासाठी व जंगल परिसरात लपवून दारूचा साठा शोधून काढण्यासाठी जिल्हा पोलिस अधीक्षक पी. आर. पाटील यांनी अशा ठिकाणांचा शोध घेण्यासाठी ड्रोन कॅमेऱ्यांची मदत घेतली आहे.