Dhule Crime News : पीकअप वाहनातून कत्तलीच्या इराद्याने गायींची वाहतूक करणारी पिकअप शिंदखेडा पोलिसांनी जप्त करत सात गोवंश यांची मुक्तता करीत तीन लाख ३५ हजारांचा ऐवज जप्त केला. (illegal Transportation of cows by pickup dhule crime news)

दोंडाईचा-सोनगीर राज्य महामार्गावर चिमठाणे गावशिवारात ही कारवाई करण्यात आली. सोनगीर-दोंडाईचा राज्य महामार्गावर चिमठाणे गावशिवरात मंगळवारी (ता.१९) दुपारी साडेबाराला सहाय्यक पोलिस उपनिरीक्षक गुलाब ठाकरे, हवालदार प्रशांत पवार, पोलिस नाईक साबीर शेख, पोलिस कर्मचारी विशाल सोनवणे व किरण पारधी यांनी चिमठाणे गावशिवारात सापळा रचून गायींची वाहतूक करणाऱ्या पिकअप (एमएच १८ बीजी ०८३६) यास थांबवित वाहनाची तपसाणी केली असता त्यात गायी, वासरे मिळून आली.

याबाबत चालक मच्छिंद्र कृष्णनाथ गिरासे (रा. सुराय ता. शिंदखेडा) याच्याकडे विचारपूस केली असता त्याने या गायी खरेदी केल्याचे सांगितले. यावर पोलिसांनी खरेदीच्या पावत्यांची मागणी केली असता त्याच्याकडे कोणत्याही प्रकारच्या पावत्या मिळून आल्या नाही. त्यानंतर पोलिसांनी चार गायी, एक गोऱ्हा व दोन वासरी यांची मुक्तता करीत चालकाविरुद्ध पोलिस ठाण्यात गुन्हा दाखल करीत सव्वा तीन लाखाचा ऐवज जप्त केला.