जळगाव : "अमृत' योजनेचे काम करताना अधिकारी कंत्राटदारास पाठीशी घालतात. या योजनेच्या कामांवर रस्त्यांची दुरवस्था झाली. नागरिक आम्हाला लाखोली वाहतात. या योजनेतील काम अपूर्ण असल्याने नागरिक आम्हाला म्हणतात काम पूर्ण करा अन्यथा राजीनामा द्या, नाहीतर काळे फासू. अधिकाऱ्यांनी कंत्राटदाराला पाठीशी घातल्याने आमच्यावर नागरिकांचे बोलणे ऐकण्याची वेळ आली. अधिकाऱ्यांनी मी आमदारकीचा राजीनामा द्यावा, अशी "सुपारी' घेतली असल्याचा त्रागा आमदार सुरेश भोळे यांनी आज जिल्हा विकास समन्वय व संनियंत्रण समितीच्या सभेत (दिशा) आज केला. 

नियोजन भवनात ही सभा झाली. अध्यक्षस्थानी खासदार रक्षा खडसे होत्या. खासदार उन्मेष पाटील, आमदार लताताई सोनवणे, आमदार शिरीष चौधरी, जिल्हाधिकारी डॉ.अविनाश ढाकणे, जिल्हा परिषदेचे सीईओ डॉ.बी.एन.पाटील व्यासपीठावर उपस्थित होते. 
खासदार खडसेंनी अमृत योजनेच्या कामाची माहिती असता, अमृतचे काम जळगावला 44 टक्के पूर्ण झाले आहे. कंत्राटदाराने सबकंत्राटदार नेमला. त्याला पेमेंट मूळ कंत्राटदाराने लवकर न दिल्याने काम गेले काही महिने बंद होते. काम पूर्ण करावयाची मुदत दोन वर्षे होती.तीही पूर्ण झाली. असे माहिती महापालिकेचे अभियंता भोळे, बोरोले यांनी दिली. त्यावर खासदारांसह जिल्हाधिकारी संतप्त झाले. जर काम वेळेत पूर्ण झाले नाही तर तुम्ही काय कारवाई केली ? ज्या स्टेपवर काम पूर्ण व्हायला पाहिजे तेव्हाच तुम्ही नोटीस का दिली नाही, त्याला ब्लॅकलिस्ट का केले नाही. एकावेळी भुयारी गटारी, अमृत योजनेचे व रस्त्यांची कामे का केली नाही. आता दोन वर्षानंतर आम्हाला माहिती देताहेत कंत्राटदाराने सब कंत्राटदार नेमला आहे.

भोंळेंचा त्रागा.. 
आमदार भोळे यांनी अधिकाऱ्यांच्या कामाबाबत त्रागाच केला. अध्यक्ष महोदय अधिकारी ऐकत नाही, कंत्राटदाराला पाठीशी घालतात. अनेक शासकीय योजनांची माहिती लोकप्रतिनिधींना देत नाही. याच्या नाकर्तेपणामुळे अनेक रस्त्यांची बिकट अवस्था झाली. नागरिक आम्हाला कामे करा नाहीतर राजीनामा द्या, असे सांगतात. अधिकाऱ्यांचा नाकर्तेपणामुळे त्यांनी मी आमदारकीचा राजीनामा द्यावा अशी सुपारीचे घेतली आहे. 

हे नक्की पहा: गुन्हेशाखेवर पोलिस अधीक्षकांची "सर्जिकल स्ट्राईक'