Dhule Crime News : मोहाडी परिसरात दहशत माजविणाच्या एलसीबीने मुसक्या आवळल्या. त्याच्याकडून गावठी कट्ट्यासह काडतूस जप्त करण्यात आले.

एलसीबीचे पोलिस निरीक्षक हेमंत पाटील यांना १८ ऑक्टोबरला मोहाडी परिसरात सुनील रमेश जाधव दहशत माजवत असल्याची माहिती मिळाल्याने एलसीबीने कारवाईचा बडगा उगारला. (LCB action against accused in Mokka dhule crime news)

मुळात सुनील जाधव गुन्हेगारी प्रवृत्तीचा असून, त्याच्याविरोधात मोक्कांतर्गत गुन्हे दाखल आहेत. त्यामुळे योग्य ती सावधानता बाळगत एलसीबीने या आरोपीच्या मुसक्या आवळल्या.

उपनिरीक्षक अमरजित मोरे, अशोक पाटील, मुकेश वाघ, जितेंद्र वाघ, हर्शल चौधरी यांना सोबत घेऊन मोहाडी गाठले. पोलिसांना पाहून सुनीलने पळण्याचा प्रयत्न केला. मात्र एलसीबी पथकाने त्याच्या मुसक्या आवळल्या.

या वेळी त्याची अंगझडती घेतली असता त्याच्याकडे ४० हजार रुपये किमतीचा गावठी बनावटीचा कट्टा तसेच दोन हजार रुपये किमतीचे काडतूस आढळून आले. पोलिसांनी हा मुद्देमाल जप्त केला असून, त्याच्याविरोधात गुन्हा दाखल केला आहे.

एलसीबी पथकाने ताब्यात घेतलेला सुनील जाधव मोहाडी उपनगर येथील पिंपळादेवीनगर येथील रहिवासी असून, त्याच्याविरोधात मोहाडी पोलिसांत मोक्कांतर्गत तीन गुन्हे दाखल आहेत. जिल्हा पोलिस अधीक्षक संजय बारकुंड, अपर पोलिस अधीक्षक किशोर काळे यांच्या मार्गदर्शनाखाली ही कारवाई करण्यात आली.