धुळे : "कोरोना' विषाणूंचा धोका टाळण्यासाठी महापालिकेने मास्क लावणे, फिजिकल डिस्टन्सिंग पाळणे बंधनकारक केले आहे. सार्वजनिक ठिकाणी थुंकण्यासही मनाई केली असून, या नियमांचे उल्लंघन करणाऱ्यांवर कारवाई करण्यात येत आहे. यात आतापर्यंत केवळ रस्त्यावर थुंकणाऱ्या 110, मास्क न लावणाऱ्या शंभरावर नागरिकांकडून तब्बल 33 हजार रुपयांचा दंड वसूल केला आहे. 

नक्‍की पहा - नमुन्यांऐवजी थेट आरोपींची कोरोना चाचणीसाठी रवानगी

कोरोना संसर्गाच्या पार्श्‍वभूमीवर प्रतिबंधात्मक उपाययोजना म्हणून मास्क अथवा तोंडाला रुमाल न बांधणाऱ्यांना 200 रुपये, सार्वजनिक ठिकाणी थुंकणाऱ्यांना प्रत्येकी शंभर रुपये दंड करण्यात येत आहे. या कारवाईत आतापर्यंत महापालिकेच्या विविध भागांतील पथकांनी केवळ सार्वजनिक ठिकाणी थुंकणाऱ्या 110 जणांवर कारवाई करून त्यांच्याकडून प्रत्येकी शंभर रुपयांप्रमाणे 11 हजार रुपये दंड वसूल केला. तोंडाला मास्क अथवा रुमाल न लावणाऱ्या 113 जणांवर कारवाई झाली असून त्यांच्याकडून प्रत्येकी 200 रुपयांप्रमाणे 22 हजार 600 रुपये दंड वसूल करण्यात आला आहे. 

दुकानदारांना 22 हजार दंड 
जीवनावश्‍यक वस्तू खरेदीसाठी मुभा दिली असली तरी दुकानदारांनी आपापल्या दुकानांवर ग्राहकांमध्ये "फिजिकल डिस्टन्सिंग' पाळणे बंधनकारक आहे. मात्र, हा नियम मोडून दुकानांवर गर्दी केल्याचे आढळून आल्याने अशा दुकानदारांकडूनही आतापर्यंत दोन हजार रुपयांप्रमाणे 22 हजार रुपये दंडाची वसुली करण्यात आली आहे. त्यामुळे महापालिकेच्या पथकांनी आतापर्यंत एकूण 55 हजार 600 रुपये दंडाची वसुली केली आहे.