चिमठाणे (धुळे) : गेल्या दहा दिवसांपासून पावसाने दांडी मारल्यामुळे शेतात कापूस पिकाची केलेली लागवड वाया गेल्याने व बॅंक ऑफ इंडियाचे कर्ज फेडू (Farmers loan) न शकल्याच्‍या विवंचनेत येथील तरुण शेतकरी (Farmer suicide) नरेंद्रसिंह चित्रभानुसिंह गिरासे (वय ४१) यांनी सोमवारी (ता. २१) सायंकाळी राहत्या घरात गळफास घेऊन आत्महत्या केली. (dhule-district-young-farmer-suicide-loan-issue-and-no-rain)

नरेंद्रसिंह गिरासे यांनी दहा दिवसांपूर्वी कपाशीची लागवड केली. लागवडीनंतर पाऊस न झाल्याने व दर वर्षी शेतीत पैसे खर्च करूनही हाताला यश नसल्याने राहत्या घराच्या छताला असलेल्या लाकडी कड्याला सुती दोराच्या सहाय्याने गळफास घेऊन जीवन संपविले. त्यांची पत्नी वाडी (ता. शिंदखेडा) येथे माहेरी गेल्या होत्या. नरेंद्रसिंह गिरासे यांनी बँक ऑफ इंडियाच्या शाखेतून शेतीसाठी कर्ज घेतले होते. वारंवार नापीक व दुष्काळी परिस्थितीमुळे कर्ज फेडू न शकल्यामुळे त्यांनी टोकाचा निर्णय घेऊन जीवन संपविले.

मुलगा– मुलगी अनाथ

नरेंद्रसिंग गिरासे त्यांच्या मागे मुलगा, मुलगी, पत्नी आहे. येथील विविध कार्यकारी सहकारी सेवा संस्थेचे माजी अध्यक्ष रणजितसिंह गिरासे यांचे ते लहान बंधू होत. त्यांच्यावर मंगळवारी (ता. २२) सकाळी अकराला अंत्यसंस्कार करण्यात येणार आहेत. याबाबत नरेंद्रसिंह गिरासे यांचे चुलत भाऊ कपिल गिरासे यांनी दिलेल्या माहितीवरून शिंदखेडा पोलिस ठाण्यात आकस्मिक मृत्यूची नोंद झाली आहे.