धुळे ः मुंबई-आग्रा महामार्गावरील (Mumbai-Agra Highway) लळिंग (laling), सोनगीर (songir) टोलनाक्यावर फास्टॅगची व्यवस्था (Fastag on Tolnaka) आहे. तरीही टोलनाक्यांवर वाहनांच्या लांबच लांब रांगा लागतात. वेळखाऊ कोंडीमुळे वाहनचालकांनी नाराजी व्यक्त केली आहे. टोल प्रशासनाच्या व्यवस्थापनाअभावी वाहनांच्या रांगा लागत असल्याचा आरोपही चालकांनी केला आहे. (laling songir tolnaka fastag vehicles traffic jam)

फास्टॅग बसविल्याने वेळेची बचत होईल, असा दावा केंद्रीय परिवहनमंत्री नितीन गडकरी यांनी केला. मात्र, लळिंग, सोनगीर टोलनाक्यावर मंत्री गडकरी यांचा दावा फोल ठरत असल्याचे चित्र आहे. या ठिकाणची फास्टॅग यंत्रणा सुरळीत करण्यात यावी आणि वाहनचालकांना दिलासा द्यावा, अशी मागणी वाहनचालकांनी केली. केंद्रीय परिवहन विभागातर्फे गेल्या दोन वर्षांपासून फास्टॅग प्रणालीची व्यवस्था करण्यात आली. फास्टॅग प्रणालीमुळे टोलनाक्यांवरील वाहनांच्या रांगा कमी होऊन वाहनधारकांच्या इंधन बचतीसह वेळेची बचत होईल, असा विश्वास परिवहन विभागास आहे.

या पार्श्वभूमीवर देशातील सर्वच टोलनाक्यांवर फास्टॅग यंत्रणा कार्यान्वित करण्यात आली. मात्र, धुळे शहराजवळील लळिंग, सोनगीर येथील टोलनाक्यावर बहुतांश वेळा वाहनांच्या रांगा असल्याचे चित्र आहे. वाहने रांगेत लागल्यानंतर बऱ्याच वेळा फास्टॅग स्कॅन होत नसल्याने वाहन मागे-पुढे करावे लागते. यात बराच काळ लागतो. परिणामी, मागे असलेली वाहने खोळंबतात. एकच वाहन बराच काळ घेत असल्याने चालक वैतागतात. वाहनांच्या लांबच लांब रांगा लागतात. यामुळे इंधनाची नासाडी होते आणि वेळेचाही अपव्यय होतो. लळिंग टोल व्यवस्थापनाने फास्टॅग सुविधेत सुधारणा करावी. वाहन जास्त काळ रांगेत उभे राहणार नाही, याची काळजी व्यवस्थापनाने घ्यावी, अशी मागणी वाहनचालकांनी केली.

रुग्णवाहिकेचे काय?
वाहनांच्या रांगेत रुग्णवाहिका अडकल्यास रुग्णासह त्यांचे नातेवाईक वैतागतात. रुग्णवाहिकांसह अत्यावश्यक सेवेतील वाहनांसाठी स्वतंत्र लेनची व्यवस्था करावी, अशी मागणीही आहे. लळिंग-अवधान टोल व्यवस्थापनाने योग्य ते बदल करून वाहनचालक आणि प्रवाशांना दिलासा द्यावा, अशीही मागणी आहे.