धुळे : शहरासह जिल्ह्यात अतिवृष्टी, महागाई व बेरोजगारीमुळे दुचाकीसह तीन व चारचाकी वाहनांच्या विक्रीची उलाढाल काहीशी मंदावली. येथील उपप्रादेशिक परिवहन विभागाकडे (आरटीओ) गेल्या दहा महिन्यांत सात हजारांहून अधिक वाहनांची नोंदणी झाली. त्यातून केवळ सुमारे 54 कोटींहून अधिक रक्कम करस्वरूपात प्राप्त झाली. मात्र यंदाच्या तुलनेत गेल्या वर्षी दुष्काळसदृश स्थिती असतानाही 63 कोटींपेक्षा अधिक उत्पन्न मिळाले होते. 

नक्‍की पहा - ...आतातरी औरंगाबाद महामार्गाचे भाग्य उजळेल? 

राज्यासह जिल्ह्यात दिवसागणिक वाहनांचा विक्रीत वाढ होत असून, असंख्य वाहनांची रस्त्यावर वर्दळ वाढली आहे. याशिवाय ट्रॅक्‍टर, कार, ऑटोरिक्षा, अवजड वाहनांतही वाढ होत आहे. मात्र सर्वसामान्यांची आवाक्‍यात असलेली मोटारसायकल खरेदी अतिवृष्टी, वाढत्या महागाईमुळे काहीशी मंदावली. केवळ जिल्ह्यात आर्थिक वर्षामधील 1 एप्रिल 2019 ते 31 जानेवारी 2020 दहा महिन्यांचा कालावधीत दुचाकीसह व चारचाकी वाहनांची विक्रीतून उलाढाल पाहावयास मिळाली. यात विविध कंपनीच्या 6 हजार 588 मोटारसायकली, तर 728 तीन व चारचाकी वाहनांची विक्री झाली. या सर्व वाहनांची नोंदणी उपप्रादेशिक परिवहन विभागात झाली असून, यातून शासनाला करस्वरूपात 54 कोटी 52 लाख 99 हजार 254 रुपयांचा महसूल मिळाला आहे. 1 एप्रिल 2018 ते 31 जानेवारी 2019 दरम्यान दुष्काळस्थिती असतानाही 63 कोटी 25 लाख 30 हजार 586 रुपयांचे उत्पन्न मिळाले होते. यंदा तुलनेत गेल्या वर्षाचा आकडा तब्बल नऊ कोटीपेक्षा जास्त होता. 

चॉइस नंबरवर कोटीचे उत्पन्न 
शहरासह जिल्ह्यात वाहनधारकांनी वाहन खरेदीनंतर वाहन नंबरावरही शासनाला मोठी रक्‍कम चुकविली आहे. यात कार, मोटारसायकल, ट्रॅक्‍टर,ऑटोरिक्षा यासह आदी वाहनांचा लक्षवेधी नंबर मिळविण्यासाठी जन्मतारीख, तसेच ओम, दादा, मामा, भाऊ या नावाशी सुसंगत असलेल्या नंबरावर वाहनधारकांकडून तब्बल एक कोटी 94 लाख 6 हजारांचा महसूल शासनाला मिळाला.