जळगाव : मुद्रा कर्ज योजनेतंर्गत जिल्ह्यात यावर्षी 1 लाखावर खातेदारांना 435 कोटींचे कर्जवाटप करण्यात आले आहे. तर सन 2019-20च्या पतआराखड्यात अकृषक, पीककर्ज, कृषी कर्ज आदी विविध घटकांतील अडीच लाखांवर खातेदारांना साडेतीन हजार कोटींचे कर्ज वाटप करण्यात आल्याची माहिती आज जिल्हास्तरीय बॅंकर्स समितीच्या बैठकीत देण्यात आली. 

गटशेतीला प्रोत्साहन मिळावे म्हणून बॅंकांनी कर्जवितरण करताना शेतकऱ्यांना प्राधान्य द्यावे, अशा सूचना जिल्हाधिकारी डॉ. अविनाश ढाकणे यांनी या बैठकीत दिल्या. या बैठकीस रिझर्व बॅंकेचे सहायक महाप्रबंधक प्रवीण सिंदकर, जिल्हा अग्रणी बॅंकेचे व्यवस्थापक अरुण प्रकाश, जिल्हा नियोजन अधिकारी प्रतापराव पाटील, जिल्हा उद्योग केंद्राचे महाव्यवस्थापक साहेबराव पाटील, ग्रामीण स्वयंरोजगार प्रशिक्षण संस्थेचे श्री. ईखारे, सहायक आयुक्त समाजकल्याण योगेश पाटील, जिल्हा ग्रामीण विकास यंत्रणेचे सहायक प्रकल्प व्यवस्थापक पी. पी. शिरसाठ यांचेसह विविध बॅंका व महामंडळांचे प्रतिनिधी उपस्थित होते. 

हेही पहा > पालिका या खड्ड्यावर का बरं मेहरबान

या दिल्या सूचना 
- बॅंकांनी प्राप्त झालेल्या पात्र अर्जांवर त्वरित कर्ज मंजूर करावे. 
- काही अडचण असल्यास त्यांना 15 दिवसांच्या आत लेखी उत्तर द्यावे. 
- प्रलंबित अर्जावर येत्या 31 डिसेंबरपूर्वी कार्यवाही करावी. 
- मुद्रा अंतर्गत पात्र अर्जदारांचे कर्ज तातडीने मंजूर करावे. 
- त्यासंबंधी माहितीसाठी प्रत्येक शाखेत अधिकारी नेमावा.

अन्य घटकांना साडेतीन हजार कोटी 
जिल्ह्याचा सन 2019-20 या वर्षाच्या वार्षिक पतपुरवठा आराखडा हा 6 हजार 455 कोटी रुपयांचा असून 30 सप्टेंबरपर्यंत पीक कर्ज, कृषी कर्ज, अकृषक क्षेत्र, प्राधान्य क्षेत्र, व अप्राधान्य क्षेत्रातील 2 लाख 63 हजार 593 खातेदारांना 3 हजार 417.15 कोटी रुपयांच्या कर्जाचे वाटप करण्यात आले असल्याची माहिती अरुण प्रकाश यांनी बैठकीत दिली.