जळगाव : येथील तहसील कार्यालयातील पथक निमखेडी शिवारातील नदीपात्रात कारवाईसाठी उतरत असताना वाळूमाफियांच्या एका गटाने त्यांच्या वाहनावर हल्ला चढवून ठार मारण्याचा प्रयत्न केला. वाहनांवर तुफान दगडफेक करीत भरधाव ट्रॅक्‍टरने वाहनातील अधिकाऱ्यांना चिरडून मारण्याचा प्रयत्न केल्याप्रकरणी तालुका पोलिस ठाण्यात गुन्हा दाखल करण्यात आला आहे. 

तलाठी राहुल पितांबर अहिरे यांनी दिलेल्या तक्रारीत म्हटले आहे, की जळगावच्या तहसीलदार वैशाली हिंगे यांच्या आदेशाने वाळूचोरट्यांवर कारवाईसाठी तहसील कार्यालयाचे पथक वाहन (एमएच 19, एम 557) घेऊन निमखेडी शिवारातील गिरणा नदीपात्रात उतरले होते. शासकीय वाहनात राहुल अहिरे, परवेझ अहमद, मनोज सोनवणे, शशिकांत नेरकर, उमेश दांडगे यांच्यासह खासगी दुचाकीने इतर कर्मचारी व अधिकारी नदीपात्राकडे जात असताना, वाटेतच वाळूचा ठिय्या केलेला आढळून आला. त्यानंतर महसूल पथकाच्या अंगावर वाळूमाफियांनी ट्रॅक्‍टर आणले, तसेच वाहनावर तुफान दगडफेकही केली. दगडफेकीत तलाठी उमेश दांडगे गंभीर जखमी झाले. जखमी अवस्थेत तलाठी दांडगे यांना घेऊन "महसूल'चे पथक वाहन सोडून पळून आले. त्यानंतर इतर अधिकाऱ्यांची दुचाकी उचलून फेकून देण्यात आली. याप्रकरणी राहुल अहिरे यांच्या तक्रारीवरून तालुका पोलिस ठाण्यात प्राणघातक हल्ला केल्याप्रकरणी गुन्हा दाखल करण्यात आला.