Dhule Crime News : लाभार्थ्यांच्या वैयक्तिक शौचालय अनुदानात दहा लाखांचा गैरव्यवहार केल्याप्रकरणी विटाई (ता. साक्री) येथील तत्कालीन सरपंच, ग्रामसेवकासह चौघांवर साक्री पोलिस ठाण्यात गुन्हा दाखल झाला.

८४ लाभार्थ्यांचे वैयक्तिक शौचालय अनुदान नियमबाह्य पद्धतीने ठेकेदाराला वाटप करून शासनाची फसवणूक केल्याचे फिर्यादीत म्हटले आहे.()

हर्शल दर्यावगीर महंत (रा. १०९, विनोदनगर, वलवाडी, देवपूर, धुळे) यांनी फिर्यादीत म्हटले आहे, की विटाई (ता. साक्री) ग्रामपंचायतीचे तत्कालीन सरपंच भीमराव भास्कर खैरनार, वकील मोतीलाल खैरनार, तत्कालीन निलंबित ग्रामसेवक रवींद्र सदाशिव वाघ व कर्मचारी युवराज हिराजी भामरे यांनी स्वच्छ भारत मिशन (ग्रामीण)अंतर्गत विटाई ग्रामपंचायतीला २०१६-१७ ते २०२०-२१ या आर्थिक वर्षात एकूण ३२६ लाथार्थ्यांना प्रोत्साहनपर अनुदान वाटप करण्यासाठी ३९ लाख १२ हजार रुपये अनुदान पंचायत समिती स्तरावरून वितरित झाले.

हे अनुदान संबंधित लाभार्थ्यांना रेखांकित धनादेशाद्वारे वितरित करण्याबाबत स्पष्ट निर्देश होते. तरीही अनुदान लाभार्थ्यांना धनादेशाद्वारे अदा न करता संबंधित ठेकेदाराला मोठ्या रकमा अदा करून ग्रामपंचायतीने ८४ लाभार्थ्यांचे सुमारे दहा लाख आठ हजारांचे अनुदान नियमांचे पालन न करता गंभीर स्वरूपाचा आर्थिक व्यवहार करत आर्थिक अनियमितता केली.

तसेच ३ ऑक्टोबरला पंचायत समिती स्तरावरून संबंधितांना अपहाराची वसूलपात्र रक्कम भरणा करण्याबाबत नोटीस देऊनदेखील रक्कम भरणा केली नाही. त्यामुळे चौघांनी अधिकाराचा दुरुपयोग करून संगनमताने ८४ लाभार्थ्यांचे वैयक्तिक शौचालय अनुदान नियमबाह्य पद्धतीने ठेकेदाराला वाटप केले व यातून शासनाची फसवणूक केली. सुमारे दहा लाख आठ हजारांच्या शासकीय रकमेचा गैरव्यवहार केला, असे फिर्यादीत म्हटले आहे. त्यावरून साक्री पोलिस ठाण्यात चौघांवर गुन्हा दाखल झाला.