कापडणे: जिल्ह्यातील दोनशेपेक्षा अधिक ग्रामपंचायतींच्या निवडणूक हालचाली गतिमान झाल्या आहेत. प्रभागरचना निर्धारित झाल्यानंतर आजपासून आरक्षण सोडतींना प्रारंभ झाला. तालुक्‍यातील सर्वाधिक मोठ्या येथील ग्रामपंचायतीची आज आरक्षण सोडत काढण्यात आली. 2011 च्या लोकसंख्येनुसार आरक्षण काढल्याने नाराजी व्यक्त होत आहे. लोकसंख्या व मतदारांत केवळ दोन हजारांचा फरक आहे. सतरापैकी नऊ जागा महिलांसाठी राखीव आहेत.

जुलै व ऑगस्टमध्ये होणाऱ्या ग्रामपंचायत निवडणुकीसाठी आज आरक्षण सोडत काढण्यात आली. सरपंच जया पाटील अध्यक्षस्थानी होत्या. मंडलाधिकारी आर. बी. राजपूत, तलाठी विजय बेहरे, महसूल कर्मचारी रवींद्र कोतवाल, माजी उपसरपंच मनोज पाटील, प्रमोद पाटील, ज्ञानेश्वर पाटील, महेश माळी, चंद्रशेखर माळी, मनोज माळी, ग्रामविकास अधिकारी किशोर शिंदे, बन्सीलाल पाटील आदी उपस्थित होते. हर्शल दीपक पाटील या विद्यार्थ्याच्या हस्ते सोडत काढण्यात आली.

जुगाराचे कर्ज फेडण्यासाठी दुचाकी चोर 

दरम्यान, 2011 च्या लोकसंख्येच्या प्रमाणानुसार आरक्षण काढण्यात आले. प्रत्यक्षात लोकसंख्या पाच ते सात हजारांनी वाढली आहे. जुन्या लोकसंख्येमुळे नागरिकांचा मागास प्रवर्ग व सर्वसाधारण पदाच्या जागा कमी झाल्या आहेत. उच्च न्यायालयात दाद मागणार असल्याचे सामाजिक कार्यकर्ते चंद्रशेखर माळी यांनी सांगितले.

कापडणेतील प्रभागनिहाय आरक्षण
प्रभाग एक : नागरिकांचा मागास प्रवर्ग पुरुष एक, सर्वसाधारण दोन, एकूण जागा तीन. दोन : नामाप्र पुरुष एक, नामाप्र महिला एक, अनुसूचित जमाती महिला एक, एकूण जागा तीन. तीन : अनुसूचित जमाती महिला एक व पुरुष एक, एकूण जागा दोन. चार : नामाप्र महिला एक, सर्वसाधारण एक महिला, सर्वसाधारण एक, एकूण जागा तीन. पाच : नामाप्र महिला एक, सर्वसाधारण एक महिला, सर्वसाधारण एक, एकूण जागा तीन. प्रभाग सहा : अनुसूचित जाती महिला एक, सर्वसाधारण महिला एक, सर्वसाधारण एक, एकूण तीन जागा.