धुळे : शहरातील अंबिका नगर येथे शुक्रवारी (ता.२०) भर दिवसा तरुणाची हत्या करण्यात आल्याची घटना घडली. हातपाय बांधून तरुणाला हत्यारांनी मारहाण करण्यात आली, त्यातच त्याचा मृत्यू झाला. जावेदअली शौकतअली सैयद (वय-३६ रा. मुस्लीमनगर, मुन्शी मशिदीजवळ, धुळे) असे मृत तरुणाचे नाव आहे. याप्रकरणी चौघांवर चाळीसगाव रोड पोलिस ठाण्यात गुन्हा दाखल झाला असून पोलिसांनी रात्रीच यातील दोघांना अटक केली.

भिकनअली लियाकत अली सय्यद (रा. मुस्लीमनगर) याने चाळीसगाव रोड पोलिसात याबाबत फिर्याद दिली. त्यानुसार शुक्रवारी (ता.२०) सकाळी दहा ते दुपारी बारादरम्यान जुनेद सलीम, तौसिफ कपाशी, शोएब ऊर्फ बबल्या सर्व (रा. धुळे) व एक साथीदार यांनी अज्ञात कारणावरून जावेदअली सय्यद याचे रुमालाने हातपाय बांधून त्याला पाठीवर, पोटावर व हातापायांवर लाकडी दांडक्याने व लोखंडी हत्यारांनी मारहाण केली. गंभीर जखमी करून त्याचा खून केला. अंबिका नगर भागातील सना स्कूल समोरील एका पत्र्याच्या शेडमधील खाटेवर तो मृतावस्थेत मिळून आला. या फिर्यादीवरून चौघांवर खुनाचा गुन्हा दाखल करण्यात आला. याप्रकरणी पोलिसांनी जुनेद सलीम शेख (वय-२२) व तौसिफ शाह ऊर्फ तौसिफ कपाशी अजीज शाह (वय-२६, रा. पत्रेवाली मशिदीजवळ, अंबिका नगर) यांना अटक केली आहे एपीआय संदीप पाटील तपास करत आहेत.