तळोदा : ज्येष्ठ नेते एकनाथ खडसे पुन्हा भाजपात जरी गेले तरी मी शरदचंद्र पवार यांच्यासोबतच काम करणार असून महाविकास आघाडीचे उमेदवार ॲड. गोवाल पाडवी यांना निवडून आणण्याची आपली जबाबदारी असल्याचे राष्ट्रवादीच्या शरद पवार गटाचे जिल्हाध्यक्ष तथा माजी आमदार उदेसिंग पाडवी यांनी केले. त्यामुळे खडसे भाजपमध्ये गेल्यावर पाडवीदेखील भाजपमध्ये जातील या चर्चेला पूर्णविराम मिळाला आहे. (Nandurbar News)

राष्ट्रवादी काँग्रेस शरदचंद्र पवार पक्षाची नंदुरबार जिल्हास्तरीय आढावा बैठक आदिवासी सांस्कृतिक भवन येथे घेण्यात आली. यावेळी अध्यक्षस्थानावरुन पाडवी बोलत होते. यावेळी कुलदेवी याहा मोगी माता, छत्रपती शिवाजी महाराज, महामानव डॉ. बाबासाहेब आंबेडकर यांना अभिवादन करून राष्ट्रवादी काँग्रेस युवक संघटनेची नवीन कार्यकारिणी जाहीर करण्यात आली.

याप्रसंगी राष्ट्रवादीचे युवक प्रदेश सरचिटणीस ॲड. दानिश शेख व युवक जिल्हाध्यक्ष संदीप परदेशी यांच्या हस्ते नवनियुक्त सदस्यांना नियुक्तीपत्र देण्यात आले.

यावेळी सर्व पदाधिकाऱ्यांचा अहवाल तपासून संघटन मजबुतीसाठी जोमाने कामाला लागण्याचे आदेश देण्यात आले.

बैठकीत जिल्ह्यातील नंदुरबार ,तळोदा ,शहादा, नवापूर ,धडगाव, अक्कलकुवातील पदाधिकारी व आमंत्रित सदस्य उपस्थित होते. आढावा बैठकीत विविध मुद्यांवर चर्चा करण्यात आली. जिल्हा सरचिटणीस हितेंद्र क्षत्रिय यांनी आभार मानले.