नंदुरबार : नंदुरबार शहराला आजमितीस पाच दिवसांआड पाणीपुरवठा केला जात आहे. याही परिस्थितीत नंदुरबारवाशियांना समाधानकारक पाणी मिळत असल्याचे चित्र आहे. मात्र, सध्या शहराला पाणीपुरवठा करणाऱ्या वीरचक धरणातील साठा केवळ २९ टक्क्यांवर येऊन ठेपला आहे. मात्र, तरीही शहरवाशियांना जूनपर्यंत पाणी पुरेल, असे नियोजन पालिका प्रशासन करीत आहे. (Nandurbar Water Scarcity Insufficient storage in dam that supplies water to city)

त्यासाठी आंबेबारा धरणातून पाणी आणून नंदुरबारवाशियांची तहान भागविली जात आहे. पाणी समस्या निर्माण होऊ नये, म्हणून नागरीकांनी पाणी जपून वापरावे, असे आवाहन करण्यात आले आहे. यावर्षी पाऊस कमी झाला आहे. त्यामुळे जिल्ह्यातील सर्वच सिंचन प्रकल्पांमध्ये जलसाठा कमी झाला होता. त्यामुळे शेतीसाठी वापरण्यात येणारे पाणीही सिंचन प्रकल्पांतून शेतकऱ्यांच्या बांधापर्यंत पुरेशे पोहोचले नाही.

अनेक गावांमध्ये पिण्याचा पाण्याची समस्या उद्भवली आहे. त्यात नंदुरबार शहरही अपवाद नाही. शहराला पाणीपुरवठा करणारे विरचक धरण पावसाळ्यात जेमतेम ५५ टक्के भरले होते. त्यामुळे उन्हाळ्यापूर्वीच शहरवाशियांना पाणीबाणीला सामोरे जावे लागणार होते. मात्र, शिवसेनेचे नेते चंद्रकांत रघुवंशी यांच्या मार्गदर्शनाखाली पालिका प्रशासनाने शहराला पाणीपुरवठा करण्याच्या पद्धतीत बदल केला.

शहरवाशियांना आवाहन केल्यानुसार सुरूवातीस तीन दिवसांआड तर आता पाच दिवसांआड पाणीपुरवठा केला जात आहे. श्री. रघुवंशी यांच्या मार्गदर्शनाखाली पालिकेचे मुख्याधिकारी अमोल बागुल यांनी योग्य नियोजन केले आहे. म्हणून तीव्र उन्हाळ्यातही नंदुरबारकरांना पाच दिवसांआड का होईना मुबलक पाणी मिळत आहे. (latest marathi news)

परंतु, सद्यस्थितीत वीरचक धरणातील जलसाठा २९ टक्क्यांवर आला असून, हा साठा शहरवाशियांना पुरेसा नाही. त्यामुळे पालिकेने जवळच असलेला अंबेबारा धरणातून ४० टक्के पाणी उचलण्याचे नियोजन केले आहे. त्यासाठी स्वतंत्र पाटचारी तयार करून तेथून पाणी वीरचक धरणापर्यंत आणले जात आहे.

४० टक्क्यांमध्ये पहिल्या टप्प्यात साधारण २० टक्के पाणीसाठा उचलला आहे. त्यानंतर पुन्हा गरज भासल्यास उचलण्यात येणार आहे. त्यामुळे जलसाठा कमी असला तरी प्रशासनाकडून नंदुरबार शहरवाशियांना पाणीटंचाईला सामोरे जावे लागणार नाही, यासाठीचे नियोजन केले जात आहे.

पाण्याचा अपव्यय टाळावा

नंदुरबार शहरातील प्रत्येक नागरिकाची जबाबदारी आहे की, पाण्याचा काटकसरीने वापर करावा, नळांना तोट्या बसवाव्यात, मोटार लावल्यास पाणी भरणे झाल्यावर ती तत्काळ बंद करावी, जेणेकरून पाणी वाया जाणार नाही. वाहने धुण्यासाठी पाण्याचा अपव्यय टाळावा, अंगणात पाणी शिंपडून पाणी वाया घालवू नये, असे आवाहन करण्यात आले आहे. नियमांचे सर्वांनी पालन करणे आवश्‍यक आहे.