नाशिक : राष्ट्रीय जंतनाशक दिनानिमित्त १ ते १९ या वयोगटातील बालक व किशोरवयीन मुला-मुलींना १३ फेब्रुवारीला अंगणवाडी व शाळा स्तरावर जंतनाशक गोळी देण्यात येणार आहे.

जिल्ह्याच्या १५ तालुक्यांमधील अंगणवाड्या व शाळांमध्ये नोंद असलेले तसेच शाळाबाह्य अशा एकूण १२ लाख ३६ हजार ३४९ बालकांना जंतनाशक गोळी देण्याचे उद्दिष्ट आहे.

सर्व सरकारी व खासगी शाळांत शिक्षक, अंगणवाडी सेविकांमार्फत तसेच आरोग्य, आशा स्वयंसेविकांमार्फत बालकांना जंतनाशक गोळी प्रत्यक्ष देणार असल्याची माहिती जिल्हा आरोग्य अधिकारी डॉ. सुधाकर मोरे यांनी दिली. (12 lakh children of Nashik district will get deworming tablets Nashik News)

जिल्हाधिकाऱ्यांच्या अध्यक्षतेखाली संबंधित सर्व विभागांच्या खातेप्रमुखांची याबाबत बैठक झाली. यात बालकाला गोळी खाऊ घातल्यावर गुंतागुंत झाल्यास त्वरित प्राथमिक आरोग्य केंद्र, ग्रामीण रुग्णालय व जिल्हा सामान्य रुग्णालय येथे संदर्भित करण्याचे आदेश देण्यात आले.

बैठकीस जिल्हा परिषदेच्या मुख्य कार्यकारी अधिकारी आशिमा मित्तल, जिल्हा आरोग्य अधिकारी डॉ. सुधाकर मोरे, अतिरिक्त जिल्हा आरोग्य अधिकारी डॉ. राजेंद्र बागूल, सहाय्यक जिल्हा आरोग्य अधिकारी डॉ. दीपक लोणे, डॉ. युवराज देवरे, जिल्हा माता बाल संगोपन अधिकारी डॉ. हर्षल नेहते आदी उपस्थित होते.

गोळी दिलेल्या प्रत्येक बालक लाभार्थ्याची नोंद ठेवली जाणार आहे. ज्यांनी १३ फेब्रुवारीला जंतनाशक गोळी खाल्ली नसेल, त्यांना २० फेब्रुवारीला गोळी देण्यात येईल, असेही डॉ. मोरे यांनी सांगितले.