Nashik News: इस्रो मॅजिका या आंतरराष्ट्रीय अंतराळ शैक्षणिक संस्थेच्या मार्गदर्शनाखाली प्रशिक्षण घेत असलेल्या बारा वर्षीय श्रावणी पांढरे हिने अंतराळातील लघुग्रह शोधला आहे. नासा पार्टनर असलेल्या खगोलशास्त्र शोध मोहिमेत लघुग्रहांच्या निरीक्षणात तिने उल्लेखनीय कामगिरी केली. (12 year old Shravani discover an asteroid in space nashik news)

पृथ्वीच्या जवळचा व मुख्य बेल्टमधील लघुग्रह तिने शोधला असून त्‍यास नासा पार्टनर असलेल्‍या ‘आयएएससी’ ने प्राथमिक दर्जा दिला आहे. या लघुग्रहाचे जागतिक स्तरावर संशोधन, अभ्यास केला जाणार आहे.

इस्रो मॅजिका या इस्रोच्या नोंदणीकृत स्‍पेस ट्यूटर संस्‍थेच्‍या पहिल्या सुपर १ हजार ज्युनिअर सायंटिस्‍ट प्रशिक्षणातदेखील श्रावणीची निवड झाली आहे. प्रशिक्षण कार्यक्रमांतर्गत येणाऱ्या लघुग्रह शोध मोहीम कार्यक्रमात तिने हे संशोधन केले आहे. इस्रो मॅजिका ही पृथ्वीवरील खगोलशास्त्रीय शोध घेणारी आणि अवकाश, विज्ञान व तंत्रज्ञानामध्ये विशेष कामगिरी करणारी मान्यताप्राप्त आंतरराष्ट्रीय शैक्षणिक संस्था आहे.

सुमारे ८० देशात ही संस्था विज्ञान, तंत्रज्ञान, गणित, अभियांत्रिकी यावर प्रमाणित करण्यात आली असून या संस्थेमध्ये नाशिकची श्रावणी पांढरे प्रशिक्षण घेत आहे. सध्या ती सेंट लॉरेंस हायस्कूल येथे इयत्ता सातवीमध्ये शिक्षण घेते आहे.

इस्रो मॅजिका या संस्थेतर्फे आयोजित आंतरराष्ट्रीय खगोलशास्त्र शोध मोहिमेत इस्रो मॅजिकाचे मुख्य कार्यकारी अधिकारी शास्त्रज्ञ प्रवीण वाकोडे यांच्या विशेष मार्गदर्शनाखाली व अंतराळ शिक्षिका शिखा सिंग यांच्यासमवेत नियुक्त केलेल्या आंतरराष्ट्रीय स्तरावरील नऊ प्रशिक्षणार्थीमध्ये श्रावणी पांढरेचा समावेश होता.

खगोलशास्त्रीय संशोधनाचा प्रवास करताना तिने पृथ्वीच्या जवळच्या लघुग्रहाच्या निरीक्षणात कौतुकास्पद कामगिरी करून लघुग्रह शोधला. याबद्दल तिला नासा पार्टनर असलेल्या आंतरराष्ट्रीय खगोलशास्त्रीय शोध सहयोगी संस्थेने विशेष प्रमाणपत्र देऊन गौरविले आहे. तसेच तिला रॉकेट लाँचिंगच्या कामगिरीत ज्युनिअर सायंटिस्‍ट म्हणून काम करण्याची संधी मिळणार आहे. या विशेष कामगिरीबद्दल तिचे विविध स्तरातून अभिनंदन केले जाते आहे.