Nashik Accident News : वणी-सापुतारा रस्त्यावर अंबानेर फाट्याजवळ पीकअपने दुचाकीस दिलेल्या धडकेत सुरगाणा तालुक्यातील दोघे दुचाकीस्वार जागीच ठार झाले.

अपघातानंतर दुचाकीने पेट घेतला. (2 dead in pick up collision on Amalner Phata nashik accident news)

गुरुवारी (ता. १) सायंकाळी साडेसातच्या सुमारास शेतमजूर दयाराम चिम महाले (वय ३० रा. महालपाडा गुही, ता. सुरगाणा) व जयवंत शांताराम बंगाळ (बंगाळपाडा गुही, ता. सुरगाणा) दुचाकीवरून नाशिकहून धार्मिक कार्यक्रमासाठी घरी महालपाडा येथे जात होते.

पाठीमागून भरधाव येणाऱ्या पीकअप (एमएच ४१, एयू ६६१९)ने त्यांच्या दुचाकीला जोरदार धडक दिली. या अपघातात दुचाकीवरील दोघे जागीच ठार झाले. अपघातग्रस्त दुचाकीने पेट घेऊन खाक झाली. मृतांना वणी ग्रामीण रुग्णालयात विच्छेदनासाठी नेले.

रात्री उशिरा वैद्यकीय अधिकारी डॉ. सिंगल व डॉ. गाडे यांनी शवविच्छेदन केले. याबाबत वणी पोलिसांत पीकअप चालकाविरुद्ध अपघाताचा गुन्हा दाखल झाला आहे. दुचाकीवरील मृत दोघे नाशिकला कंपनीत कामाला होते. शुक्रवारी (ता. २) धार्मिक कार्यक्रम असल्याने घरी जात असताना, त्यांच्यावर काळाने घाला घातला.